Infografıkany jasaǵan – Záýresh SMAǴUL ,«EQ»
Saýalnama 11 shilde men 12 tamyz aralyǵynda uıymdastyrylǵan. Oǵan elimizdiń 17 oblysynan jáne respýblıkalyq mańyzy bar – Astana, Almaty, Shymkent qalasynan 18 jastan asqan 8 myń azamat qatysqan.
Áleýmettik zertteýde respondentterdiń 75,9%-y elimiz qazirgi ýaqytta durys baǵytta damyp keledi dep esepteıtinin atap ótken. Saýalnamada qoǵamdaǵy optımızmniń deńgeıin de anyqtady. Eń joǵary senim kórsetkishi 18 ben 29 jas aralyǵyndaǵy azamattar arasynda tirkelgen. Al jas ulǵaıǵan saıyn bolashaqqa degen senim birshama tómendeı túsetini baıqalǵan. Máselen, 61 jastan asqan respondentterdiń tek 70,6%-y eldiń bolashaǵyna senim bildirgen.
Bir qyzyǵy, memlekettiń damý baǵytyn oń baǵalaýda aýyl turǵyndarynyń kórsetkishi qala turǵyndarynan joǵary bolyp otyr. Bul aýyldyq jerlerde júrgizilip jatqan áleýmettik reformalardyń naqty áserin ańǵartsa kerek.
Eldiń durys baǵytta damyp kele jatqanyn qoldaǵan respondentterdiń basym bóligi qazirdiń ózinde naqty júzege asyrylyp jatqan birqatar mańyzdy reformany atap ótti. Bul rette aýyldyq jáne qala mektepteriniń salyný men jańartylýy, «Ulttyq qor – balalarǵa» baǵdarlamasynyń iske asýy, BJZQ-dan
qarajattyń bir bóligin sheship alý múmkindigi ataldy. Odan bólek kópshiligi memlekettik qyzmetterdiń sıfrlyq formatqa kóshýin, otbasynyń sıfrlyq kartasyn, áleýmettik ámııannyń bar ekenin biletinin jetkizgen. «Zań jáne tártip» qaǵıdaty men «Taza Qazaqstan» jalpyulttyq aksııalaryn da erekshelep aıtqan.
Bul kórsetkishter azamattardyń óz ómirinde naqty ózgeristerdi baıqap otyrǵanyn dáleldeıdi. Iаǵnı júrgizilip jatqan reformalar halyqtyń kúndelikti turmysyna tikeleı áser etip, memlekettik saıasatqa degen senimdi kúsheıtip, bolashaqqa degen optımızmdi arttyryp otyr.
Ekonomıkalyq reformalar men áleýmettik bastamalardyń tıimdi iske asýy el basshylyǵyna degen qoǵamdyq senimniń artýynan kórinis tabýda. Saýalnama nátıjeleri boıynsha respondentterdiń 82,4%-y Prezıdentke senim bildirgen.
Sonymen qatar qoǵamda patrıottyq kóńil kúıdiń de aıtarlyqtaı óskeni baıqalady. Zertteýge qatysqan azamattardyń 89,9%-y Qazaqstanmen jáne osy eldiń azamaty bolǵany úshin maqtanatynyn aıtqan. Onyń ishinde 49,1%-y «óte maqtanamyn» dese, 40,8%-y «maqtanamyn» dep jaýap bergen.
El bolashaǵyna qatysty respondentterdiń kópshiligi elimizdiń óńirlik qana emes, jahandyq deńgeıde de kóshbasshy bola alatyn salalaryn atap ótken. Máselen, agroónerkásiptik sektor, sıfrlandyrý jáne jasandy ıntellekt, energetıka, kólik jáne tranzıt, adam kapıtaldy damytý – eń perspektıvaly baǵyt.
Zertteý barysynda qoǵamdaǵy qundylyq ustanymdarǵa da taldaý jasalǵan. Máselen, saýalnamaǵa qatysqan azamattardyń 80%-y elimizde LGBT nasıhatyna zań júzinde shekteý qoıýdy qoldaıtynyn bildirgen. Bul qoǵamnyń ulttyq qundylyqtar men dástúrge beıimdiligin kórsetedi.
