Asyǵyń alshysynan tússin, Aıajan!

Qolónerdi serik etken Aıajan kish­kentaıynan sýret ónerine jaqyn bolǵan. Dızaıner bolamyn degen bala armany adastyrmaǵan eken. Áýelde qoly qalt etse, muǵalimder úshin kór­neki aqparat quraldaryn jasaıtyn. Keıin syılyqtyń qoraptaryna kóshti. Túrli órnektegi qoraptarǵa degen tap­syrys ústi-ústine túsken. Ideıany kóbi­ne­se áleýmettik jeliden izdedi. Halyq­qa ne keregin zerttedi. Zertteı júrip ónerin ushtady. Zamannyń talabyna qaraı tehnıka qoldana bastady.

– Eń aldymen, ózime qyzyqty, janyma jaqyn ispen aınalysqym keldi. Bir kúni kishkentaı sińlimdi oınatyp otyryp, balanyń sanasyn damytatyn oıynshyqtardy nege ózimiz jasamaımyz degen oı keldi. Sóıtip, úı jaǵdaıynda logıkalyq suraqtarǵa toly oıynshyqtar jasaı bastadym. Buǵan ata-analar ǵana emes, balabaqsha tárbıeshileri de qyzyqty, – deıdi jas kásipker Aıajan Qýatbekqyzy.

Sóıtip, kompıýterli grafıka ar­qyly syzbasyn syzyp, túrli-túrli oıynshyqtar jasap sata bastaǵan. О́zi­niń uly tárbıelenip jatqan bala­baq­sha tárbıeshilerimen birge bal­dyr­ǵan qyzyǵatyn oıynshyqtardy zert­teı túsken.

– Ne istesek te ultqa tamshydaı bolsyn paıdamyz tıse deımin. Sol ustanymmen qazaqı naqyshta qaı­ta­lanbaıtyn oıyndar jasaı bas­tadym. Ony áleýmettik jeli arqyly jarnamaladym. О́zimizdiń óńirdi qoıyp, Atyraý, Aqtaýdan tapsyrys tústi, – deıdi jas kásipker sehtaǵy tańǵy jumysyna kirisip jatyp.

Qarap otyrmyz, áp-sátte arnaıy materıaldan asyq oıyp shyǵara qoı­dy. Kádimgi qoıdyń asyǵynan aýmaı­dy. Tapsyryspen alǵyzatyn shıki­zaty sertıfıkattalǵan, balaǵa esh zııan­y joq. Shaǵyn sehynda qazir­gi sha­rýaǵa qajetti prınterdiń túr-túri bar. Biri bylǵaryǵa oıý bassa, endi biri túrli oıynshyq oıady. Bári avtomattandyrylǵan. Kompıýterdegi syzba boıynsha buıryqty oryndaı beredi. IT salasyna jany jaqyn Aıajan Qýatbekqyzy bul baǵytta jasandy ıntellekt arqyly da jobalar jasaý­dy oılap otyr. Iá, jospar kóp. Tek qarjynyń jetispeýshigi – qolbaılaý. Sonyń ózinde úsh adamdy jumyspen qamtyp otyr.

–  Biz tehnıka tilin de meńgerip al­dyq. Shyǵarmashylyq jumys bolǵan­­­dyq­tan, asqan qyzyǵýshylyqpen isteı­­miz. Alda qazaqstandyq brend oıyn­shyq­tar shyǵaryp jatsaq, ol bizdiń úlken jetistigimiz bolar edi, – deıdi seh qyz­metkeri Janna Qashqynbaeva.

Shaǵyn ujym oıynshyqtardan bólek balabaqsha, mektepterde bezendirý jumystarymen de aınalysady. Eger memleket tarapynan qandaı da kómek bolsa, kásip keńeıip, násiptiń de artary anyq. Aıajan Qýatbekqyzy jýyqta «Táýelsiz urpaqtary» grantyna ótinim bergen. Eger kásibi talaptarǵa saı kelip, maquldansa, 3 mln teńgege ıe bolady. Ol qarjyny qazaq ertegilerin dáripteı­tin oıyndar jasaýǵa jumsaıtynyn aıtady.

Ras, ulttyq dástúrimizdiń jańǵy­rýyna, jandanýyna bir kisideı atsa­lys­saq, kúni erteń-aq ala-shubar til­den qutylyp, táı-táı basqan bal­dyrǵandardyń tili tek ana tilinde shyǵady. Áıt­pegende, telefonǵa tel­mirgen bala ózgeniń tilinde sóılep, ózgeniń táli­min sińirip jatqan joq pa? Ol úshin Aıajannyń asyǵy alshysynan túsýi kerek.

Shyǵys Qazaqstan oblysy,

Glýbokoe aýdany