Máýlen Áshimbaev qatysýshylarǵa iltıpat bildirip, jahandyq sıfrlandyrý men jasandy ıntellektini engizýdiń qoǵam ómirine jáne barlyq salaǵa yqpaly zor ekenin aıtty. Bul úderis álemniń bet-beınesin, adamdardyń oılaý júıesin, minez-qulqyn jáne qundylyqtaryn da ózgertetini anyq. Senat tóraǵasy mundaı tarıhı kezeńde taban tireıtin qundylyqtardy aıqyndap, olardy jańa zamanǵa beıimdeý jáne tyń tetikter arqyly ýaqyt talaptarymen úndestirý joldaryn anyqtaý mańyzdy mindet ekenine nazar aýdardy. Sondaı-aq ol Memleket basshysy únemi osy baǵyttaǵy ıdeologııalyq jumysqa basa mán berip kele jatqanyn atap ótti.
«Prezıdent Qasym-Jomart Toqaev Joldaýda Qazaqstandy úsh jyl ishinde jappaı sıfrlyq elge aınaldyrý jóninde naqty mindet júktedi. Mundaı qadam ulttyq biregeıligimizdi odan ári nyǵaıtýǵa tyń serpin beredi. Kezdesý barysynda atalǵan baǵyttar men ulttyq qundylyqtardy dáripteýde sıfrlyq tehnologııalardy qoldaný máseleleri jan-jaqty talqylanyp, tyń usynystar aıtylaryna dep senemiz», dedi M.Áshimbaev.
Palata spıkeri atap ótkendeı, búginde adamzat jańa tehnologııalyq dáýirge qadam basty. Byltyr bıznes jasandy ıntellekt salasyna 250 mlrd dollardan asa ınvestısııa quısa, bıylǵy kórsetkish odan birneshe ese joǵary. Sonymen qatar byltyr álemdik kompanııalardyń 78 paıyzy jasandy ıntellektini qoldanatynyn rastaǵan. Bul atalǵan baǵyttyń asa joǵary qarqynmen damyp, qoǵam ómirine jappaı enip jatqanyn kórsetedi. Osyǵan baılanysty M.Áshimbaev sıfrlyq dáýirdi qaýip emes, múmkindik retinde qarastyryp, ulttyq jáne sıfrlyq ımmýnıtetti odan ári nyǵaıtý mańyzdy ekenin tilge tıek etti.
«Ulttyq qundylyqtar zaman kóship, dáýirler almassa da, shaıqalmaıtyn negiz, qubylmaıtyn baǵdar bolyp qalýy kerek. Sonymen qatar adaldyq, eńbekqorlyq jáne ortaq jaýapkershilik sekildi jalpy adamzattyq uǵymdar da aıryqsha mánge ıe. Osy oraıda ulttyq qundylyqtarymyzdy sıfrlyq keńistikke alyp shyǵyp, zamanaýı tásildermen dáriptegen abzal. Iаǵnı sıfrlandyrý – qazirde ulttyq qundylyqtardy nasıhattaýdyń tıimdi tetigi. Sondyqtan sıfrlyq dáýirdi qaýip emes, múmkindik retinde qarastyrǵan jón», dedi M.Áshimbaev.
«Ulttyq múdde» dıalog alańynda senatorlarmen qatar Ulttyq mýzeı dırektory Berik Ábdiǵalıuly, Qazaqstan Jazýshylar odaǵynyń Basqarma tóraǵasy Mereke Qulkenov, Qazaqstannyń eńbek sińirgen qaıratkeri Baıanǵalı Álimjanov, Temirbek Júrgenov atyndaǵy Qazaq ulttyq óner akademııasynyń rektory Arman Júdebaev, Jastar teatrynyń kórkemdik jetekshisi Nurqanat Jaqypbaı, IT-vızıoner, CEO CodiPlay Danabek Qalıajdarov, Prezıdent janyndaǵy QSZI bólim meńgerýshisi Saltanat Ermahanova, sýretshi Syrlybek Bekbotaev, Astana IT University «Jasandy ıntellekt» ǵylymı-ınnovasııalyq ortalyǵynyń dırektory Beıbit Ábdikenov, Senat janyndaǵy Sarapshylar klýbynyń múshesi Janerke Kochııgıt jáne taǵy basqa qatysýshylar sóz sóıledi.
Sonymen qatar «Ulttyq múdde» dıalog alańynyń otyrysy aıasynda shyǵarmashylyq ındýstrııa ókilderi, onyń ishinde ÓzgeEpic, lıngvıster, stýdentter, ónertanýshylar, sýretshiler jáne basqa da túrli sala mamandary jańa tehnologııalardyń kómegimen ázirlegen jobalar kópshilikke tanystyryldy. Olardyń qatarynda vızýaldy jáne ınteraktıvti tehnologııamen jabdyqtalǵan E-museum veb-portaly bar. Atalǵan joba álemniń kez kelgen buryshyndaǵy azamattarǵa 3D úlgi arqyly ulttyq mádenı muramyzdy tamashalaýǵa múmkindik beredi. Sondaı-aq otyrysqa qatysýshylar rýna jazýyn optıkalyq jáne ıntellektýaldyq taný arqyly oqyp, taldaýǵa, «Steppe Games» mobıldi oıyny arqyly qazaq tilin oqytýǵa, «Qazaq ádebıetiniń aýdıoqory», Qorqyt, Oyu Resonance bastamalary arqyly ulttyq ádebıet, tarıh jáne ónerdi tanýǵa arnalǵan jańa jobalarmen tanysty.
