Aýdıt nátıjesinde Qazaqstannyń IKAO halyqaralyq standarttaryna sáıkestik deńgeıi 95,7% boldy. Bul kórsetkish álemdik ortasha deńgeıden (72,01%) jáne Eýropa elderiniń ortasha kórsetkishinen (87,92%) aıtarlyqtaı joǵary.
Qazaqstannyń nátıjesi TMD elderi men IKAO-nyń Eýro-Azıattyq (EUR/NAT) aımaǵy boıynsha eń úzdik kórsetkishterdiń biri sanalady. Salystyrmaly túrde:
-
Ázerbaıjan – 74,66%;
-
О́zbekstan – 85,47%;
-
Qyrǵyzstan – 85,76%;
-
Grýzııa – 89,75%;
-
Belarýs – 91,85%;
-
Reseı – 94,14%.
Taıaý Shyǵys óńirindegi keıbir elderdiń kórsetkishteri de joǵary: BAÁ – 98,4%, Qatar – 96,72%, Saýd Arabııasy – 94,41%.
Qazaqstannyń avıasııalyq qaýipsizdik boıynsha aldyńǵy kórsetkishi 83% bolǵan edi.
Jańa nátıjeler elimizdiń avıasııalyq qaýipsizdik salasyndaǵy negizgi zańnamasy men baǵdarlamalarynyń, kadrlyq daıarlyq pen tehnıkalyq baqylaýdyń, sapany basqarý jáne sertıfıkattaý júıeleriniń tıimdiligin aıqyndaıdy. Bul kórsetkish áýejaılardaǵy qaýipsizdiktiń joǵary deńgeıin, halyqaralyq tasymaldaýshylardyń senimin jáne AQSh baǵytyndaǵy tikeleı reısterdi ashýǵa múmkindik beretin birinshi sanatty alý áleýetin kórsetedi.
IKAO baǵasy 2019 jyldan beri júzege asyrylyp kele jatqan keshendi reformalardyń nátıjesi bolyp otyr. Bul kezeńde Qazaqstannyń avıasııalyq ákimshiligi qurylyp, avıasııa qyzmetkerleriniń biliktiligi arttyryldy, táýekelge baǵdarlanǵan baqylaý tetikteri engizildi.
Aýdıt qorytyndysy – Qazaqstannyń jolaýshylar men avıasııa ındýstrııasy úshin qaýipsiz ári senimdi áýe qatynasyn qamtamasyz etýge baǵyttalǵan halyqaralyq standarttarǵa adaldyǵynyń naqty dáleli.
