Sala basshysynyń aıtýynsha, keıingi jyldary kópshilik kórermenniń, sonyń ishinde sheteldik aýdıtorııanyń da qazaq fılmderine yqylasy artyp keledi.
Joǵaryda atap ótken jetistiktermen qatar bıyl keıingi 30 jylda alǵash ret Qazaqstan Kann qalasynda ótken eń iri kınonaryqtardyń biri – «Marché du Film» alańynda óz stendin usyndy. Bul – otandyq prodıýserler men dıstrıbıýtorlar úshin úlken beles.
«Sonymen qatar biz «Eýrazııa» halyqaralyq kınofestıvalin qaıta jańǵyrttyq. Bul – naqty qadamdardyń biri. Biz úshin fılmderimizdiń sheteldik festıvaldarda kóringeni ǵana emes, óz kórermenderimizge de keńinen jetýi asa mańyzdy. Bıyl elimizdiń kınoteatrlarynda «Tezek», «Feıkovyı Arman», «Qaıtadan» sekildi otandyq 10 fılm kórsetildi. Solardyń ishinde «Qaıtadan» fılmi prokatta 1 mıllıard teńgeden astam tabys taýyp, memleket salǵan qarajatty tolyq qaıtardy. Bul – kıno salasyn jańǵyrtýdaǵy baǵytymyzdyń durys ekeniniń bir dáleli» deıdi Mádenıet jáne aqparat mınıstri Aıda Balaeva.
Qazir kórermen avtorlyq týyndylardan góri, kóbine jeńil janrdaǵy fılmderdi tańdaıtyn bolǵan. Sol sebepti jobalardy irikteý kezinde kóbine ıdeıa jáne ssenarıımen qatar, fılmniń kórermenge qanshalyqty qyzyq bolatynyna da mán beriledi eken.
2024 jyldan bastap memleket tarapynan qoldaý tapqan árbir fılm aldymen el kınoteatrlarynda kórsetilýge tıis degen mindetti shart engizildi. Tek sodan keıin ǵana onlaın-platformalarǵa shyǵarylady. Atalǵan sheshim fılmderdiń qoljetimdiligin arttyryp, kórermenmen baılanys ornatýǵa sebep bolady.
«Biz tarıhı ári patrıottyq baǵyttaǵy jobalardy da turaqty túrde qoldaımyz. Sonyń aıǵaǵy – jýyrda jaryq kórgen «Kapıtan Baıtasov» fılmi. Bul týyndy – erlik, namys pen borysh aldyndaǵy adaldyq jaıynda tereń oıǵa jeteleıdi. Halyq qaharmany, polısııa kapıtany Ǵazız Baıtasovtyń erligine arnalǵan shyǵarma kópshilikti izgi qundylyqtarǵa úndeıdi.
Sondaı-aq taǵy bir aıryqsha joba – «Álııa» fılmine toqtalyp ótkim keledi. «Microcosm Pictures» jaýapkershiligi shekteýli seriktestigimen birlesken joba byltyr Ulttyq kınony qoldaý ortalyǵy ótkizgen baıqaýda jeńimpaz atanǵan edi. Alaıda prodakshn-kompanııa qarjylyq sebepterge baılanysty túsirýden bas tartty. Soǵan qaramastan, aldaǵy ýaqytta bul ıdeıa qaıta jandanyp, Álııa Moldaǵulova týraly fılm mindetti túrde kórermenderge jol tartady dep senemiz» deıdi mınıstr.
Onyń málimdeýinshe, kıno óndirisin barynsha ashyq ári zamanǵa saı etý maqsatynda e-Kıno atty sıfrlyq platforma qurylyp jatyr. Onda fılmderdiń túsirilimi, tabysy, kórermenniń sany sııaqty barlyq derek jınalady. Búginde elimizdegi kınoteatrlardyń jartysy osy júıege qosyldy. Bul baǵytta jumys jalǵasýda. e-Kıno júıesi naryqtaǵy naqty jaǵdaıdy ashyq kórýge jol ashady.
Naqty ózgeris óz nátıjesin bere bastaǵan. Sonyń nátıjesinde, memleket qoldaýyna ıe bolǵan 57 jobanyń 40-y – jas rejısserlerdiń jumysy. Al qazaq tilindegi fılmderdiń úlesi búginde 75 paıyzǵa jetip otyr.
Kınematografııa týraly zańǵa engizilgen jańa túzetýler memleketke qarjylandyrýdyń 30 paıyzyn tikeleı «Qazaqfılm» kınostýdııasyna bólýge jol ashty. Bul – ulttyq kıno ındýstrııasynyń kóshbasshysy úshin úlken múmkindik.
«Búginde «Qazaqfılm» belsendi damyp, seriktestermen birlesip jumys istep, tehnıkalyq múmkindikterin arttyryp keledi. Kınostýdııa ulttyq kıno qoryn sıfrlandyrý jáne qalpyna keltirý jumystaryn júrgizýde. Sonymen birge «Qazaqanımasııa» jobasy iske qosylyp, elimizde alǵash ret anımasııany kreatıvti ındýstrııanyń bóligi retinde damytý tujyrymdamasy ázirlendi. Bizdiń mindetimiz – shyǵarmashylyq erkindikke jaǵdaı jasaý jáne avtor men kórermen arasynda senimdi dıalog ornatý.
Barlyq uıymdastyrýshylyq jáne tehnıkalyq sheshim ashyq ári zań aıasynda qabyldanady. Qazir Ulttyq kınony qoldaý ortalyǵyn «Qazaqfılm» kınostýdııasymen biriktirý máselesi qarastyrylyp jatyr. Bul – óndiris úderisin jeńildetip, tıimdilikti arttyrýǵa baǵyttalǵan qadam. Mádenıet jáne aqparat mınıstrligi aldaǵy ýaqytta da otandyq kınony damytý baǵytyndaǵy jumysyn jalǵastyra beredi», deıdi Aıda Ǵalymqyzy.
Sonymen qatar mınıstr qoǵam tarapynan túsetin suraqtarǵa toqtaldy. Máselen, jaqynda kóp talqylanǵan taqyryptardyń biri – rejısser Rústem Omarovtyń «Ofsaıd» atty serıalynyń YouTube jelisinen óshirilip, avtordyń Instagram paraqshasynyń buǵattalýy. «Bul jaǵdaıdyń jeke, ıaǵnı naqty bir akkaýntqa qatysty jaıt ekenin atap ótkim keledi. Mundaı kezde akkaýnt ıesi óz betimen onlaın-platformanyń ákimshiligine habarlasyp, paraqshany qalpyna keltirý jáne sebepterin anyqtaý týraly ótinish bere alady.
Otandyq onlaın-serıaldar men beınejobalarda ádepsiz sózderdiń qoldanylýyna baılanysty da suraqtar kóterildi. Bul rette eskeretin jaıt – qazirgi zańnamada mundaı áreket úshin naqty jaýapkershilik belgilengen. Iаǵnı qoǵamdyq oryndarda ádepsiz sóz aıtý — usaq buzaqylyq dep tanylady. Ol úshin 20 aılyq eseptik kórsetkish kóleminde aıyppul salý, 20-dan 60 saǵatqa deıin qoǵamdyq jumystarǵa tartý nemese 5-ten 15 táýlikke deıin ákimshilik qamaýǵa alý jazasy qarastyrylǵan. Quzyrly organdar árbir osyndaı jaǵdaıdy jeke qarastyrady.
Bıyl jyl basynan beri ınternettegi monıtorıng nátıjesinde osyndaı 50-den astam quqyqbuzýshylyq anyqtalyp, olardyń barlyǵy boıynsha Ishki ister mınıstrligine tıisti habarlama joldandy» dedi mınıstr.
Sózin túıindeı kele sala basshysy mınıstrlik árdaıym ashyqtyqty, shyǵarmashylyq erkindikti jáne kórermenge degen jaýapkershilikti basty maqsat etetinin atap ótti. Sonymen qatar kıno men medıa salasynyń damýy qoǵamǵa, mádenıetke jáne buqarany ortaq qundylyqtarǵa qurmetpen qaraýǵa negizdelýge tıis ekenine toqtaldy.
Daıyndaǵan –
Joldybaı BAZAR,
«Egemen Qazaqstan»
