Memleket basshysy Vladımır Pýtındi jahandyq deńgeıdegi saıası tulǵa retinde joǵary baǵalap, onyń esimi álemniń kóptegen elinde qurmetpen atalatynyn aıtty.
Toqaev ótken jyldyń qarashasynda Reseı Prezıdentiniń Qazaqstanǵa jasaǵan memlekettik saparyn tarıhı oqıǵa dep atady.
«О́tken jyldyń qarasha aıynda Reseı Prezıdenti Qazaqstanǵa memlekettik saparmen keldi. Bul sapar óziniń saıası jáne praktıkalyq mańyzy jaǵynan tarıhı oqıǵa boldy. Astanada bizdiń seriktestigimizdiń jańa kókjıekterin ashatyn aýqymdy qujattar toptamasyna qol qoıyldy. Mańyzdysy – sanksııalyq qysym men halyqaralyq shıelenisterge qaramastan, eki el yntymaqtastyqtyń turaqtylyǵy men serpindi damýyn saqtap, qorǵap qala aldy», dedi Prezıdent.
Memleket basshysy Máskeýge baratyn aldaǵy memlekettik sapardyń aıryqsha mańyzdylyǵyn atap ótti.
«Aldaǵy kelissózder eki el qarym-qatynasyna jańa mazmun berip, áriptestikti tereńdetýge baǵyttalmaq», dedi Memleket basshysy.
Sonymen qatar Prezıdent Toqaev sońǵy aılarda QHR Tóraǵasy Sı Szınpınmen, AQSh Prezıdenti Donald Tramppen, sondaı-aq Eýropa, Azııa jáne Afrıka elderiniń basshylarymen mazmundy kezdesýler ótkizgenin aıtty.
«Olardyń kópshiligi geosaıası spektrdiń qarama-qarsy baǵyttarynda turǵanyna qaramastan, barlyǵy da Reseı men onyń kóshbasshysynyń halyqaralyq qatynastardaǵy túıindi máselelerdi sheshýdegi erekshe rólin moıyndaıdy. Basqasha aıtqanda, qazirgi álemdegi qaıshylyqtardy Máskeýdiń qatysýynsyz eńserý múmkin emes», dedi Toqaev.
Qasym-Jomart Toqaevtyń aıtýynsha, Qazaqstan men Reseıdiń memleketaralyq qatynastary naǵyz úlgi bolarlyq deńgeıge jetti. Sońǵy otyz jyldan astam ýaqyt ishinde eki el kópjaqty yntymaqtastyqty halyqtardyń ıgiligi úshin damytyp keledi. Al Vladımır Pýtınmen ótetin aldaǵy kelissózder bul seriktestikke jańa serpin beredi.
