Ermek BAIYMBETOVA,
Balqash aýdany Baqanas aýylynyń turǵyny:
– Monshaqtan túrli buıym men syıkádeler jasaýdy 20 jyldan buryn qandastardan úırengen edim. Mine, zeınetke shyqqaly 6 jylǵa aıaq basty. Eń basty ermegime ári azǵantaı bolsa da tabys tabýyma sep bolyp otyr. Ár buıym zor yqylas, shynaıy shabytpen jasalady. Mysaly, kúni keshe aıaqtaǵan myna qumyraǵa 300 gramnan artyq monshaq ketti.
Eńlik DÁÝLETKELDI,
Kegen aýdanynan kelgen tiginshi:
– Kegen aýylynda jeke kásipker Merýert Nurǵazıeva jetekshilik etetin qazaqy kıimder tigetin sheberhanamyz bar. 2014 jyldan beri jumys isteıdi. Prezıdentimizdiń «Ulttyq naqyshty ulyqtaıyq!» atty tapsyrmasyna oraı, oıýly kostıým, búrmeli kóılek, úkili taqııa tigýdi jandandyryp kelemiz. Jyldyq óndiristik qýaty – 1 000 dana kıim tigý. Bıyl aýdandyq «О́ner» mektebiniń ónerpazdar ujymyna, sondaı-aq memlekettik, áleýmettik sala qyzmetkerlerine arnap kostıýmder tiktik. Budan bólek, qala, aýyldyq jerlerdegi balabaqshalardan, mektepterden arnaıy tapsyrystar qabyldaımyz. Sebebi juma kúni aýdannyń bilim mekemelerinde oqýshylar ulttyq naqyshta forma kııýdi dástúrge aınaldyrǵan. Kıimniń barlyǵyna qajet oıý-órnekter qolmen jasalady. Sapaly bolýyna basa nazar aýdarylady. Tigin sehynda 3 sheber jumys isteımiz. Tapsyrysqa qaraı kúnine 10 shaqty, aptasyna 100 shaqty oqýshylar formasy tigiledi. Oǵan qosa toqyma zattar, bıserden buıymdar jasaımyz.
Elvıra SPANOVA,
Alataý qalasy Jetigen shaǵyn aýdanynyń turǵyny, sheber:
– Bıylǵy jyly quraq kórpelerimmen 660 quraqshy álemdik rekord jasaǵan «Alaman Quraq-2025» jobasyna qatysyp, arnaıy sertıfıkat aldym. Bul jetistik meni qanattandyra tústi. Úıde is tigemin. Úsh bala ósirip otyrmyn, onyń bireýi erekshe bala, bıyl 18 jasqa tolady. Quraq quraýdyń adam ómirine áseri zor, oǵan qosa kúnkóriske de septesedi.
