Basqarma tóraǵasy Sultanǵalı Kenjequlov «Kazakh Invest» kompanııasynyń bıylǵy 10 aıdaǵy qyzmetiniń qorytyndysy týraly baıandady. Sonymen qatar uıymdyq qurylymdy ózgertý máselelerin dırektorlar keńesiniń talqylaýyna shyǵardy. Atap aıtqanda, ortalyq keńsede qosymsha laýazymdar engizý, shetelderde jańa ókildikter ashý usynyldy.
Úkimet basshysy «Kazakh Invest» kompanııasy usynyp otyrǵan uıymdyq qurylymyn qabyldamady, ony daıyndaýdaǵy ústirt kózqarasty atap ótti. Oljas Bektenov qoldanystaǵy shtat sany sheńberinde kompanııany sapaly túrde qaıta qurylymdaý qajettigine nazar aýdardy. Jumystyń ábden bıýrokratııalanyp, naqty nátıjelerge baǵyttalmaı otyrǵanyna qatysty syn aıtyldy.
Premer-mınıstr «Kazakh Invest» ekonomıkaǵa qomaqty ınvestısııa tartýdyń tıimdi, ıkemdi ári utqyr quralyna aınalýǵa tıis ekenin atap ótti. Ol úshin úderisti qaıta qurylymdap, árbir qyzmetker úshin naqty tıimdilik kórsetkishterin engizý qajet.
Ulttyq kompanııa otandyq óndirýshilerdi qoldaý arqyly ınvestorlar tóńireginde turaqty óndiris tizbegin qurýǵa baǵyttalǵan.
«Bul jumysty kúsheıtý qajet. Eń bastysy – naqty nátıje. Syldyr sózden buryn, jobalardy júzege asyrýǵa, kásiporyndardy iske qosýǵa mán berý kerek», dep atap ótken O.Bektenov «ınvestısııalyq tapsyrys» tetigin belsendi paıdalaný qajettigin basa aıtty.
Bul resýrstardy kómir men munaı hımııasy, agroónerkásip, mashına jasaý sııaqty taǵy basqa da keleshegi zor salalarda eksportqa baǵyttalǵan óndiris qurýǵa baǵyttaýǵa múmkindik beredi.
Jıyn qorytyndysy boıynsha «Kazakh Invest» kompanııasyna kún tártibi sheńberinde usynylǵan qujattardy on kún ishinde pysyqtaý tapsyryldy.
