Sýret: 018.kz
«Jastar praktıkasyna» 35 jasqa deıingi el azamattary qatysa alady. Birinshi kezekte úmitkerdiń mamandyǵy boıynsha bilimi bolýǵa tıis. О́ıtkeni baǵdarlama – oqýyn bitirip, jumys tappaı júrgen túlekterdiń óz mamandyǵyna qatysty tájirıbe jııýyna taptyrmas múmkindik. Nege deseńiz, eńbek naryǵynda jumys berýshilerdiń tańdaýy kóbine jas mamanǵa emes, óz salasynda ysylǵan, daıyn qyzmetkerge túsedi. Saldarynan tájirıbesi joq jastar óz mamandyǵynan jerinýi ábden múmkin. «Jastar praktıkasy» arqyly jumysqa ornalasqandar kóshin qazir Túrkistan oblysy bastap tur. О́ńirde 6 myń adam osy baǵdarlamanyń múmkindigin paıdalanǵan. Sol sekildi Qyzylorda oblysynda – 2,3 myń, Jambyl oblysynda – 1,7 myń, Aqtóbe oblysynda – 1,5 myń, Shymkent qalasynda 1,3 myń jas mamandyǵyna qatysty tájirıbe jııýdy jón kórgen.
Baǵdarlamaǵa qatysatyn áıelderdiń úlesi 66,5% nemese 14,3 myń adamdy qurasa, aýyl turǵyndarynyń úlesi 12,7 myń adamdy nemese 59,1%-dy quraıdy. Bul statıstıkaǵa óńirdiń áleýmettik-ekonomıkalyq jaǵdaıyna oń áser etedi. Qalaǵa qaraǵanda aýylda úmitkerlerdiń kóp bolýy tegin emes. Osy múmkindikti bilim uıymdaryna jumysqa ornalasýdy kózdeıtin jumyssyz túlekter de paıdalana alady. Ol úshin jumysqa ornyǵyp, tájirıbe jııýdy oılaǵan jas mansap ortalyǵyna ótinish berýi qajet.
Budan ári jas maman jumysqa qabyldanǵanda qaraýsyz qalmaıdy. Jumys berýshi kásibı bilim men jumys tájirıbesimen bólisetin tálimger bekitedi, bir sózben aıtqanda, súıemeldeıdi. Búginde elimiz kóleminde baǵdarlama qatysýshylarynyń ortasha jalaqysy 118 myń teńgeni quraıdy. Munyń ózi – mamandyǵyna qatysty tájirıbe jııýdy oılaǵan talapty jasqa jaqsy múmkindik. Sebebi ujymda shyńdalyp, óz jumysyn urshyqsha ıirýge mashyqtanǵan mamanǵa suranys bolary sózsiz.
«Jastar praktıkasy» arqyly jumysqa ornalasqandardyń arasynda eń kóp suranysqa ıe mamandyq – jalpy bilim beretin mektep muǵalimi. Oǵan 5 863 adam jas maman qatysqan. Sol sekildi mektepke deıingi tárbıeshi – 807, medısına qyzmetkeri – 2 005, baǵdarlamashy – 1 094, zańger – 784, feldsher – 766.
Múmkindikti paıdalanyp, jumysqa ornalasqan jastardyń arasynda Oral qalasynyń turǵyny Elmar Temir bar. Ol medısına baǵytynda bilim alǵan. Talapty jas tájirıbe jııýdy oılap, mamandyǵy boıynsha eńbek ete bastaǵan. Qazir sol jumysta turaqtap qalýdy josparlap otyr.
«Bıyl Batys Qazaqstan joǵary medısınalyq kolledjin «Emdeý isi» mamandyǵy boıynsha támamdadym. Oqýdy bitirgen soń, birden mansap ortalyǵyna baryp, jumyssyz retinde tirkeldim. Ortalyqta jastar praktıkasy týraly aqparatqa qanyqtym. Shamamen on kúnnen keıin meni Qaratóbe aýdandyq aýrýhanasyna jumysqa jiberdi. 3 qyrkúıekten bastap sol jerge turaqty jumysqa qabyldady», deıdi Elmar.
Baǵdarlamaǵa qatysqandardyń ishinde sol jumys ornynda turaqtap jatqandar bir qaýym. Tájirıbe jınap, basqa jumysta baǵy janǵandar da az emes. Bastysy, eki jaǵdaıda da jas maman men jumys berýshi utylmaıdy.
