Bul tizim álemde iske asyrýǵa usynylǵan 100 úzdik bilim berý ınnovasııasyn qamtıdy.
Jyl saıyn Fınlıandııadaǵy HundrED úkimettik emes uıymy búkil álem boıynsha bilim berý salasyn ózgertetin eń tıimdi ári aýqymdy tájirıbelerdi tańdaıdy. 2025 jyly 70 elden 800-den astam ótinim tústi, sarapshylar 150 jobany iriktep, úzdik 100 jobany anyqtady. Olardyń qatarynda AITAS Foundation-ǵa qarasty Bilim berý salasyn turaqty damytý qory júzege asyrǵan shaǵyn jınaqty mektepterdiń áleýetin sıfrlyq tehnologııalar arqyly damytý jobasy bar.
Negizgi tizimge Qazaqstanmen qatar Ulybrıtanııa, Kanada, Úndistan, Norvegııa jáne AQSh-tyń da jobalary endi. Bul elder qazirdiń ózinde álemdik bilim berý júıesiniń bolashaǵyn qalyptastyryp jatyr.
«HundrED Global Collection 2026 shyn máninde bilim berý júıesin ózgertetin sheshimderdi atap ótedi. Qazaqstanda jasalǵan jumys – aýyl mektepterin qoldaýdyń aýqymdy ári turaqty tásiliniń jarqyn mysaly», – dep atap ótti HundrED zertteý dırektory Katrın Bergstrıom.
Aıta keteıik, 2023-2024 jyldary Aqtóbe oblysynda Bilim berý salasyn turaqty damytý qory QR Oqý-aǵartý mınıstrliginiń, «Qazaqstan halqyna» qorynyń, oblys ákimdiginiń jáne AITAS holdınginiń qoldaýymen aýyldaǵy shaǵyn jınaqty mektepterde bilim sapasyn arttyrýǵa baǵyttalǵan keshendi jobany júzege asyrdy.
Joba 134 shaǵynjınaqty jáne 12 tirek mektepti qamtydy. Nátıjesinde sıfrlyq ınfraqurylym jaqsartylyp, pedagogter jańa ádistemeler boıynsha oqytyldy, aralas jáne qashyqtan oqytý túrleri iske qosyldy. Muǵalimder men oqýshylardyń kórsetkishteri aıtarlyqtaı artqany táýelsiz baǵalaý arqyly dáleldenip, HundrED halyqaralyq sarapshylary tarapynan moıyndaldy.
«Bizdiń HundrED tizimine enýimiz – iri bıznestiń áleýmettik mıssııasy júıeli ózgeristerge ákeletinin dáleldeıdi. Biz bıznes, qoǵam jáne memleket kúshin biriktire otyryp, turaqty jobalardy iske asyramyz. Bul jańalyq – barlyq seriktester úshin maqtanysh. Jetistigimiz Qazaqstannyń bilim men ıntellektýaldy kapıtal salasynda tıimdi sheshimder usyna alatynyn kórsetedi», – dedi Bilim berý salasyn turaqty damytý qorynyń (AITAS Foundation) jetekshisi Danııar Toktarbaev.
Jalpy alǵanda, bilim berý salasyndaǵy úzdik 100 ınnovasııa tizimine 52 elden jańashyl jobalar endi. HundrED tizimine engen jobalar jyl saıyn álemniń jetekshi bilim ınstıtýttary men donorlarynyń nazaryn aýdarady. Olardyń tásilderi kóptegen elderde ulttyq reformalardyń bir bóligine aınalady.
Qazaqstannyń shaǵyn jınaqty mektepterdi qoldaý modeli – memleket, bıznes jáne qoǵamnyń ornyqty seriktestigi arqasynda qala men aýyl arasyndaǵy bilim sapasyndaǵy alshaqtyqty azaıtýdyń úlgisi retinde qarastyrylýda.
Bıyl Aqtóbe oblysynyń tájirıbesi Soltústik Qazaqstan oblysynda masshtabtalyp jatyr.
