Sýretti túsirgen – Jumabaı MUSABEK
Ashylý rásiminde sóz alǵan qala basshysy Ernat Bázil jańa ortalyqtyń óńir turǵyndary úshin mán-mańyzyn atap ótti.
– Adamnyń eń qymbat qazynasy – densaýlyq. Sol sebepti sapaly medısınalyq qyzmet kórsetý – basty mindetimiz. «Asmarmed» ortalyǵynyń ashylýy – osy baǵyttaǵy naqty qadam. Bul joba arqyly qalaǵa 1,1 mlrd teńge ınvestısııa tartylyp, 150 jańa jumys orny ashyldy. Mundaı bastama Taldyqorǵannyń áleýmettik ınfraqurylymyn nyǵaıtyp qana qoımaı, turǵyndardyń ómir sapasyn jaqsartýǵa eleýli úles qosady, – dedi E.Bázil.
Em-dom ortalyǵy medısınalyq tehnologııanyń sońǵy jetistikterimen jabdyqtalǵan nysan. Munda zertteý kabınetteri, klınıkalyq zerthanalar, fızıoterapııa, emdik dene shynyqtyrý bólimderi ornalasqan. Keshen úsh negizgi bloktan turady, táýlik boıy jumys isteıtin 40 tósektik oryndyq stasıonar bar. Munda naýqastarǵa táýlik boıǵy, kúndizgi, jedel reanımasııalyq kómek kórsetiledi. Mamandardyń aıtýynsha, ortalyq kúnine 100-ge deıin pasıent qabyldaýǵa qaýqarly. Bul qala men mańaıdaǵy eldi meken turǵyndaryna úlken múmkindik.
Jańa ortalyqtyń ashylýyna qala turǵyndary da erekshe yqylas tanytty.
– Medısınalyq ortalyqtyń ashylýy – úlken qýanysh. Buryn analız tapsyrý nemese em alý úshin birneshe jerge júgirýge týra keletin. Endi bári bir orynda, sondaı-aq dárigerlerdiń naýqastarmen qarym-qatynasy da barynsha qalypty, qyzmet kórsetý mádenıeti óte joǵary, – deıdi taldyqorǵandyq zeınetker Raýshan Ábdiqadyrova.
Jas ana Gúlmıra Mahanova da osyndaı ortalyqty kópten beri kútip júrgenin aıtty.
– Balamdy profılaktıkalyq tekseriske ákeldim. Qyzmetkerlerdiń kásibı deńgeıi, zamanaýı jabdyqtar kóńil qýantady. Mundaı ortalyqtardyń kóp bolǵany jaqsy. Sonyń arqasynda turǵyndar medısınalyq kómekti jedel ári sapaly alady, – deıdi ol.
Qala ákiminiń baspasóz qyzmetiniń málimetinshe, búginde Taldyqorǵanda 60-tan astam memlekettik, jekemenshik medısınalyq mekeme jumys isteıdi. Alaıda halyq sanynyń ósýi men qyzmet sapasyna degen suranystyń artýy jańa medısınalyq ortalyqtardyń qajettiligin aıqyndap otyr. Bul ortalyq – osyndaı suranysty óteıtin zamanaýı keshen. Munda tájirıbeli mamandar qyzmet etedi. Sóıtip, turǵyndarǵa joǵary deńgeıdegi dıagnostıka, em, ońaltý qyzmetterin usyný josparlanyp otyr.
Medısına salasynyń ardageri, dáriger Serikjan Tóleýhanov ortalyqtyń ashylýyn óńir medısınasyndaǵy jańa kezeń dep baǵalady.
– Búgingi medısına tek aýrýdy emdeý emes, onyń aldyn alý men halyqtyń densaýlyq mádenıetin kóterýge baǵyttalýǵa tıis. «Asmarmed» ortalyǵy osy maqsatqa saı keletin mekeme. Zamanaýı jabdyqtar, kásibı kadrlar men qolaıly jaǵdaı – munyń bári turǵyndarǵa kórsetiletin qyzmet sapasyn arttyrady, – deıdi maman.
Jetisý oblysy búginde áleýmettik baǵyttaǵy jobalardy damytýǵa basymdyq berip otyr. Densaýlyq saqtaý salasyna ınvestısııa tartý arqyly óńirde jańa medısınalyq ınfraqurylym qalyptasyp keledi. Taldyqorǵandaǵy «Asmarmed» kópsalaly ortalyǵy – osy saıasattyń bir kórinisi. Bul nysan turǵyndarǵa qoljetimdi medısınalyq kómek kórsetýmen qatar, jastarǵa jumys berip, qalanyń ekonomıkalyq áleýetin de arttyrady.
Atalǵan ortalyq – Jetisý jurtynyń densaýlyǵyn nyǵaıtý jolyndaǵy mańyzdy qadam. Zamanaýı quraldarmen jabdyqtalǵan, bilikti mamandar qyzmet etetin mekeme Taldyqorǵan medısınasynyń jańa belesin tanytyp otyr. Halyqtyń senimi men qýanyshy – ortalyqtyń eń úlken jetistigi.
