Adal azamat – ádiletti qoǵamnyń aınasy

Memlekettik qyzmetshiniń kúndelikti ómiri onyń kásibı mindetimen tyǵyz baıla­nys­ty. Rýhanı mádenıeti men bilimi, al­ǵan tárbıesi onyń tulǵalyq bolmy­syn qurap, nátıjesinde is-áreketine yqpal etedi. Memlekettik qyzmetshi – halyq pen bılik arasyndaǵy altyn kópir. Onyń minsiz bedeli memlekettik ap­pa­rat­­tyń bedelin arttyrady, al bul tutas el­diń turaqty damýyna yqpal etedi.

Ádep pen ádilet birge júretin egiz uǵym bolǵandyqtan, ádepti de adal qyz­metshi – ádiletti qoǵamnyń aınasy. Memlekettik qyzmetshiniń árbir isinde ádeptilik, ádildik, adaldyq, parasattylyq kórinis tapqan jaǵdaıda ǵana halyqtyń senimi de artady.

Ádep degenimiz – tek minez-qulyq normalary emes, qyzmet mádenıetiniń, qoǵam aldyndaǵy jaýapkershiliktiń kórset­kishi. Memlekettik qyzmettegi ádepti ádil sheshim qabyldaý, ashyq bolý, parasatty sóıleý, árbir isinde halyqtyń senimin saqtaý dep túsinemiz. Ádeptilik – kásibıliktiń belgisi. Ádep saqtalǵan jerde ózara syılastyq ornaıdy, al syılastyq bar jerde senim men nátıjelilik qatar júretini sózsiz.

Prezıdent Qasym-Jomart Toqaev aıtqandaı: «Ádiletti Qazaqstannyń basty qundylyǵy – adal eńbek pen jaýapkershilik». Memlekettik qyzmet­shi osy qaǵıdatty kúndelikti isimen dá­leldeýge tıis. Bul rette ádep normalary men sybaılas jemqorlyqqa qarsy mádenıet – bir-birin tolyqtyratyn uǵym ári birtutas júıe. Al onyń túpqazyǵy – adamnyń ishki adaldyǵy, ıaǵnı óz isine, halqyna, memleketine degen shynaıy jaýapkershiligi jáne qoǵam aldyndaǵy paryzdy seziný.

Búgingi tańda ádep mádenıetin qalyptastyrý – tártip saqtaý emes, rýhanı ortany jáne senimge negizdelgen jumys ahýalyn nyǵaıtý. Osy turǵyda Ádep jónindegi ýákildiń róli de mańyzdy. Ony keńesshi, úılestirýshi, ujym mádenıetin saqtaýshy tulǵa dep sanaımyz. Sebebi etıkany májbúrleý arqyly úıretý múmkin emes, ol tulǵalyq sana men orta mádenıetiniń úılesimimen jáne senim arqyly qalyptasady.

Memlekettik qyzmet isteri agenttiginiń tóraǵasy D.Jazyqbaıdyń «Ádiletti Qazaqstan – Adal azamat» atty monografııasynda: «Qazirgi bizdiń qoǵam memlekettik qyzmetshilerden eldik jáne qoǵamdyq múddelerge ádil jáne adal qyzmet etýin, óz kúsh-jigerin, bilim men tájirıbesin otanymyzdyń damýy­na jumsaýyn kútedi. Memlekettik qyzmetshiniń tulǵalyq jetilýi – tutastaı qoǵam ózgerýiniń alǵysharty», deıdi. Osy turǵyda, «Ádiletti Qazaqstan – Adal azamattan bastalady» degen qaǵıda barsha memlekettik qyzmetshiniń kásibı jáne adamgershilik ustanymynyń negizgi ólshe­mi­ne aınalýǵa tıis.

Gúljahan ÚSENOVA,

Memlekettik qyzmet isteri agenttiginiń Ádep jónindegi ýákili