Agenttik tóraǵasy óz baıandamasynda EYDU-ǵa 17 jyldyq yntymaqtastyǵy úshin alǵysyn bildire otyryp, «EYDU-nyń Qazaqstandaǵy qoǵamdyq adaldyq jónindegi sholýy» jarııalanýyn osy yntymaqtastyqtyń mańyzdy nátıjesi ekenin aıtty. Bul qujat sybaılas jemqorlyqqa qarsy tetikterdiń turaqtylyǵyn baǵalaıdy jáne 2022–2026 jyldarǵa arnalǵan Sybaılas jemqorlyqqa qarsy saıasat tujyrymdamasyn iske asyrýdaǵy mańyzdy kezeń.
«Biz qundylyqtar júıesin formaldy oryndaýshylyqtan sanaly qyzmet etýge kóshirip jatyrmyz», dedi D.Jazyqbaı. О́z sózinde agenttik tóraǵasy Prezıdent Qasym-Jomart Toqaevtyń memlekettik basqarý mádenıetin ózgertý baǵytyna bastama kótergeni atap aıtty.
Onyń aıtýynsha, bul jumystyń negizgi elementi – barlyq deńgeıde adaldyq júıesin qalyptastyrý. Mektepterde «Adal azamat» baǵdarlamasy engizilip jatyr, joǵary oqý oryndarynda akademııalyq adaldyq modýlderi oqytylýda, al memlekettik qyzmetshiler úshin ádep jáne sybaılas jemqorlyqqa qarsy is-qımyl boıynsha úzdiksiz oqytý mindetti negizde júzege asyrylyp keledi.
Sonymen qatar agenttik tóraǵasy elimiz sybaılas jemqorlyqtyń saldarymen kúresýden onyń sebepterin aldyn alýǵa baǵyttalǵan júıeli transformasııa jolyna túskenin atap ótti.
Baıandamada atap ótilgendeı, Qazaqstan EYDU Keńesiniń qoǵamdyq adaldyq jónindegi usynymyna qosylýǵa múddelilik tanytyp otyr. Bul bizdiń Respýblıkamyzdyń BUU, EYDU jáne GREKO ustanymdary men halyqaralyq standarttaryn qoldaıtynyn aıǵaqtaıdy.
