Qazir Aqtaý teńiz soltústik termınalynan júkter Iran, Reseı, Ázerbaıjan baǵyttaryna jóneltiledi. Aldaǵy ýaqytta kompanııa óndiristik tıimdilikti arttyryp, jańa seriktester tartyp, júk aǵyndaryn ártaraptandyrýdy kózdep otyr. Ortamerzimdi kezeńde Qytaı, Reseı, Parsy shyǵanaǵy elderinen keletin tranzıttik júkterdiń úlesi artady degen jospar bar.
Júıeli jumystar nátıjesinde bıylǵy on aıdyń qorytyndysynda termınaldaǵy júk aınalymy arta túsken. Derekter jalpy 697 myń tonna júk óńdelip, ótken jylmen salystyrǵanda 187%-ǵa artyq nátıjege qol jetkenin, al eksport kólemi 537 myń tonnaǵa jetip, 304% ósimge ıe bolsa, ımport 160 myń tonnaǵa deıin ulǵaıǵandyǵyn kórsetip otyr.
Sondaı-aq negizgi júk túrleri boıynsha da turaqty ósim bar, astyq ónimderi 279%-ǵa artyp, 408 myń tonnaǵa jetse, ózge júkter 127%-ǵa kóbeıip, 289 myń tonnany qurady. Konteınerlik tasymaldar kólemi de eki ese artqan. Injınırıng jáne qaýipsizdik jónindegi dırektor Ermek Moldabekovtiń aıtýynsha, kompanııa qurylymynda úsh teńiz aılaǵy bar, sonyń ekeýi qurǵaq júkke, biri astyq tıeýge arnalǵan.
– 2018 jyly paıdalanýǵa berilgen nysan zamanaýı tehnıkamen jabdyqtalǵan. Termınaldyń jalpy aýmaǵy 39 gektardy qamtıdy, jyldyq jobalyq qýattylyǵy – 3 mıllıon tonna. Onyń ishinde 2 mıllıon tonnasy jalpy júkterge, 1 mıllıon tonnasy astyq ónimderine tıesili. Astyq termınaly bir mezette 60 myń tonnaǵa deıin astyq saqtaýǵa múmkindik beredi, – deıdi ol.
Termınaldaǵy tirshilik tynysy men eńbek yrǵaǵynyń qýaty – óńirdiń ekonomıkalyq áleýetiniń bir kórsetkishi. Atalǵan nysandaǵy ilgerileýge qarap, aımaqtyń kúsh-qýaty men atqarylǵan jumystar áleýetin ańǵarýǵa bolady.
Mańǵystaý oblysy
