Túrli deńgeıdegi máslıhattardaǵy «AMANAT» partııasy depýtattyq korpýsynyń atqarǵan jumys nátıjesi «AMANAT» partııasynyń Hatshysy Eldar Jumaǵazıevtiń tóraǵalyǵymen ótken keńeste qaraldy. Oǵan óńirlerdegi máslıhattardyń tóraǵalary qatysty. Qatysýshylar partııanyń saılaýaldy ýádelerin oryndaý, kásipkerlerge qoldaý kórsetý máselelerin, sondaı-aq bıznes qaýymdastyǵynyń jańa Salyq kodeksi boıynsha jumysqa daıyndyq deńgeıin talqylady.
Is-sharany ashqan Eldar Jumaǵazıev aldaǵy jyly partııa bızneske barynsha qoldaý kórsetýge, memlekettik sheshimderdiń ashyqtyǵyn qamtamasyz etýge, kásipkerlerdiń, ásirese shaǵyn jáne orta bıznes ıeleriniń múddelerin eskerýge tıis ekenin atap ótti. Kelesi jyly 1 qańtardan bastap kúshine enetin jańa Salyq kodeksine (JSK) sáıkes, ońaılatylǵan deklarasııa negizinde arnaıy salyq rejıminiń mólsherlemesin tómendetý nemese arttyrý týraly sheshimdi máslıhattar qabyldaıdy jáne atalǵan másele bıyl 1 jeltoqsanǵa deıin tolyq sheshilýge tıis. Ol birqatar óńirde talqylaý jumysy aıaqtalǵanyn jáne keıbir máslıhattar shaǵyn jáne orta bıznestiń múddelerin eskere otyryp, tómen mólsherlemelerdi bekitkenin atap ótti.
«Jańa salyq júıesi aıasynda shaǵyn jáne orta bıznes qosymsha júktemege tap bolýy múmkin. Biz bir jaǵynan bıznes úshin ádil bolatyn, sonymen birge jergilikti bıýdjetterdiń turaqtylyǵyn qamtamasyz etetin sheshimder qabyldaýymyz kerek. Máslıhattardyń mólsherlemelerdi bekitý týraly qaýlylary negizdelip, kásipkerlerge jetkizilýge tıis. Mólsherlemelerge kez kelgen ózgeris engizý áreketi muqııat saraptalyp, bıznes-qoǵamdastyqqa jiti túsindirilýi kerek», dedi partııa Hatshysy.
Máselen, 28 qazanda О́skemen qalasynda tıisti sheshim qabyldandy. О́skemen qalalyq máslıhatynyń tóraǵasy Aleksandr Svetashtyń aıtýynsha, arnaıy salyq rejımi aıasynda mólsherlemeni tómendetý qadamy kásipkerlerdi «kóleńkeli aımaqtan» shyǵýǵa jáne salyqty belgilengen tártippen tóleýge yntalandyrady. Oblys ortalyǵynda tipti bıznes sýbektileriniń sany artyp keledi.
Al osy jyly 17 qazanda Soltústik Qazaqstan oblysy Aqqaıyń aýdanynda máslıhat depýtattary salyq mólsherlemesin 4%-dan 3%-ǵa deıin tómendetý bastamasyna qoldaý bildirdi. Halyq qalaýlylarynyń pikirinshe, bul shara bolashaqta jańa kásiporyndardyń ashylýyna yqpal etip, nátıjesinde halyqty jumyspen qamtý deńgeıi artady.
Buǵan qosa, Atyraý qalasynda, Atyraý oblysyna qarasty Mahambet jáne Jylyoı aýdandarynda, sondaı-aq Aqmola oblysynyń Jaqsy aýdanynan basqa barlyq aýdanynda 2% tómendetilgen mólsherleme bekitildi.
Keńes barysynda óńirlerdegi partııa fılıaldary janyndaǵy kásipkerlik máseleleri boıynsha úılestirý keńesteriniń jumysyn uıymdastyrý qadamdary da talqylandy. Eldar Jumaǵazıev búginde bıznesti tolǵandyrǵan túıtkildi máselelerdiń tizimin qurý jumysyn aıaqtaýdyń mańyzy zor ekenin atap ótti.
«Bizdiń mindetimiz – jıyndardy formaldy túrde ótkizý emes, bıznesti tolǵandyrǵan ózekti máselelerdi anyqtaý, olardy jergilikti jáne ortalyq memlekettik organdarǵa jetkizý, máseleni jergilikti jerde sheshý jumysyn qamtamasyz etý. Kásipkerler partııa qoldaýyn sezinýi kerek. Biz olarǵa jobalaryn júzege asyrýǵa jáne bıznes turaqtylyǵyn saqtap qalýǵa múmkindik berýimiz kerek. Bul qadam, ásirese salyq zańnamasy ózgergen tusta asa mańyzdy», dep túıindedi partııa hatshysy.
Aıta keteıik, elimizdegi 8 oblysta ornalasqan 27 aýdan men qalada ońaılatylǵan deklarasııa negizinde jańa arnaıy salyq rejımi úshin mólsherlemeni tómendetý týraly sheshim qabyldandy. Sonymen qatar, taǵy 60 aýdanda mólsherleme tómendeýi kútiledi.
