Jazýshynyń «Zamana belesteri», «Qyran kegi», «Sımlıan teńizi» «Mektep túlekteri», «Shoqan asýlary», «Qyran týraly ańyz» sııaqty kóptegen shyǵarmasyn jas oqyrmandar qyzyǵyp oqıdy. Al artynda qalǵan rýhanı murasyn nasıhattaý isi qazirgi kúni jalǵasyn taýyp keledi. Búginde Almatydaǵy balalar kitaphanasy Saparǵalı Begalın esimimen atalady.
О́ńirlik kommýnıkasııalar qyzmetinde balalar jazýshysy, folklorshy, qoǵam qaıratkeri Saparǵalı Begalınniń týǵanyna 130 jyl tolýyna arnalǵan brıfıngte nemeresi Gúlnar Begalına qalamgerdiń HH ǵasyrdaǵy qazaq ádebıeti men mádenıetine sińirgen eńbegi jaıynda aıtyp ótti.
Onyń sózinshe, Saparǵalı Ysqaquly jazýshy, ǵalym ǵana emes, aqyldy da meıirimdi ata bola bildi. Ol eń qıyn jyldardyń ózinde júregindegi jylýyn balalary men nemereleri, aınalasyna tartý etti.
«Jastaıynan bilimge qushtar body. Rýhanı damýǵa umtyldy. Qazaq zııalylarynyń kórnekti ókilderi Muhtar Áýezov, Qanysh Sátbaev jáne Álkeı Marǵulanmen jaqyn aralasty. Osy oraıda Muhtar Áýezovtyń «Sapekeń óz mashyǵy – óz sóz órnegi, óz mazmuny, óz ereksheligi bar belgili qazaq aqyny bolýymen qatar, esimi búkil elge málim balalar jazýshysy» dep aıtqany eske oralady», dedi Gúlnar Begalına.
Jazýshy ómiriniń kóp bóligin folklordy zertteýge, halyq ánderi, ańyzdary, dastandaryn jınaýǵa, aýyz ádebıeti murasyn saqtaýǵa arnady. Qalamgerdiń 1946 jyly jazylǵan «Jambyl» kitabynyń 50 jyldan keıin jaryq kórgeni belgili.
S. Begalın atyndaǵy Ortalyq qalalyq balalar kitaphanasynyń basshysy Alma Qonarova mereıtoıǵa arnalǵan mádenı bastamalar týraly aıtyp berdi. Qazirgi kezde jazýshy shyǵarmashylyǵyn nasıhattaý jumystary jalǵasyn taýyp jatyr. Balalarǵa avtordyń kitaptaryn ǵana emes, ol ómir súrgen dáýirdiń rýhyn da kórsetý maqsatynda kórmeler serııasyn, ádebı saǵattar men taqyryptyq kezdesýler josparlanǵan. Osyǵan oraı 21 qarashada «Rýhanı mura qamqory» atty respýblıkalyq dóńgelek ústel ótedi.
Búginde kitaphana qorynda S.Begalınniń ómirine qatysty sırek basylymdar, qoljazbalar jáne muraǵattyq fotosýretter saqtalǵan. Sondaı-aq jazýshynyń týystary tapsyrǵan jeke zattarynan shaǵyn murajaı jasalǵan.
«Biz ádebı muramen qatar jazýshynyń ǵylym men folklortanýǵa sińirgen eńbegin de jınaýǵa tyrystyq. Bul oqyrmandarǵa jazýshynyń ómir jolymen tereńirek tanysýǵa múmkindik beredi», dedi Alma Qonarova.
Osy dataǵa oraı jyl boıy balalar jazýshylary jáne ádebıet zertteýshilerimen kezdesýler, mektepter men kitaphanalarda Begalın shyǵarmalaryn oqý, oqýshylarǵa arnalǵan ınteraktıvti is-sharalar, sondaı-aq jazýshy ómiri týraly taqyryptyq jınaqtar men materıaldardy tanystyrý josparlanyp otyr.
ALMATY
