Hakatonǵa qazaq tilin úıretýge arnalǵan platformalar, jasandy ıntellekt negizindegi chat-bottar, oıyndar men mobıldi qosymshalar baǵytynda óz jobalaryn qorǵaǵan Bilim-ınnovasııa lıseıi, Nazarbaev zııatkerlik mektebiniń 10, 11, 12-synyp oqýshylarynan, ustazdarynan, JOO stýdentterinen, IT mamandarynan quralǵan 11 komanda qatysty.
– Bul hakaton – qazaq tilin sıfrlyq keńistikte damytýdyń naqty qadamdarynyń biri. Biz búgingi is-sharada kórgen jobalar tek tehnologııalyq jańalyq emes, sonymen qatar qazaq mádenıeti men dástúrin jańa formada tanystyrýdyń bir tásili. Árbir komandanyń jumysy – qazaq tiliniń zamanaýı kontekste qalaı ómir súre alatynyn kórsetetin tájirıbe. Mysaly, jasandy ıntellekt negizindegi chat-bottar nemese mobıldi qosymshalar arqyly balalar men eresekter qazaq tilin qyzyqty ári tıimdi úırene alady. Búgingi qatysýshylardyń shyǵarmashylyq oıy, jańa tehnologııany qoldaný sheberligi jáne mádenı qundylyqqa degen qurmeti – ulttyń rýhanı kodyn saqtaı otyryp, ony sıfrlyq dáýirge beıimdeýdiń kórinisi. Hakaton barysynda jobalardy baǵalaý ǵana emes, ıdeıalardyń qoǵamǵa áser etý áleýetin, olardy naqty iske asyrý múmkindigin de qarastyrdyq. Bul – jańa bastamalar men kreatıvti sheshimderdiń shynaıy jarys alańy, ári jas urpaqqa óz qabiletterin kórsetýge, tájirıbe jınaýǵa múmkindik beredi. Osyndaı jobalardyń arqasynda qazaq tilin úırenýdi tek mindetti is retinde emes, qyzyqty ári tartymdy úderis retinde usynamyz. Jas komanda músheleri óz ıdeıalaryn qorǵap, tehnıkalyq sheshimderin kórsetý arqyly bilim men ınnovasııanyń úndestigin dáleldedi. Árbir joba qazaq mádenıetin jańa qyrynan ashyp, ony zamanaýı tehnologııalarmen ushtastyrýǵa baǵyttalǵan. Bolashaqta bul bastama oblys deńgeıinde ǵana emes, respýblıkalyq masshtabta da keńeıip, qazaq tilin sıfrlyq ortada keńinen nasıhattaýǵa jol ashady, – deıdi oblystyq lıngvıstıkalyq ortalyǵynyń dırektory Qýandyq Kenjebekuly.
Qatysýshylardyń jumystaryn kásibı til mamandary men IT salasynyń ókilderinen quralǵan qazylar men sarapshylar toby joba ıdeıasy men tehnıkalyq iske asyrý múmkindigi negizinde baǵalady. Sonymen hakaton qorytyndysynda 1-oryndy Brutal Fairies komandasy (Ádilhan Álısher, Nurdáýlet Anarbekov, Medahmet Asylmurat), 2-oryndy COR komandasy (Nııazbek Elnar, Álııa Tolymhanova, Rahym Raıymuly, Aıajan Táńirberdi), 3-oryndy Anyz Game komandasy (Ádil Qaıratuly, Mıras Almasuly, Ravıl Maratuly, Aqbota Nurǵalıeva) ıelendi. Al bas júlde RýhAI komandasyna (Erkejan Serikqalıeva, Maqsat Jetenbaev, Erkebulan Maratov, Rollan Sársembaev) tabystaldy. I, II, III oryn ıegerleri Home Credit Bank demeýshiligimen aqshalaı syılyqtarǵa ıe boldy. Gran-prı ıegerleri qazaq tiliniń damýyna baǵyttalǵan jobany júzege asyrý úshin Abaı oblysynyń lıngvıstıkalyq ortalyǵymen yntymaqtastyq kelisimshartqa qol qoıady. Barlyq jeńimpaz respýblıkalyq «Tárbıe basy – tal besik» forýmyna qatysyp, Ǵylym jáne joǵary bilim mınıstrliginiń Til saıasaty komıteti, «Halyqaralyq qazaq tili qoǵamy» jáne Sh. Shaıahmetov atyndaǵy «Til-Qazyna» ortalyǵy ókilderimen kezdesedi dep josparlanyp otyr. Osylaısha, júldeli oryn ıegerleri aldaǵy ýaqytqa josparlanǵan respýblıkalyq forýmda óz jobalaryn tanystyratyn boldy.
Abaı oblysy
