Ol úsh jyldyq bıýdjetti ázirleý kezinde eldiń áleýmettik-ekonomıkalyq damýynyń 10 jyldyq boljamy jasalǵanyn jáne ol ár 3 jyl saıyn jańartylyp otyratynyn aıtty.
Bul – fıskaldyq jáne monetarlyq saıasattardyń ózara baılanysyn qamtamasyz etetin negizgi element. Odan bólek bıýdjettik sholý qorytyndysy boıynsha 68 mlrd teńge ońtaılandyryldy, bul rette memlekettik qyzmetterdiń sapasyna nuqsan kelgen joq.
Ákimshilik shyǵystardyń úlesi 15%-dan 12%-ǵa deıin tómendetildi. Bıýdjettik sholý nátıjeleri men ońtaılandyrý jónindegi sheshimder ashyq aqparat kózderinde jarııalanǵan.
«Investısııalyq tártipke kóshý nátıjesinde tıimdiligi rastalmaǵan jobalar bıýdjetten alynyp tastaldy, jetkiliksiz qarjylandyrý táýekelderi azaıtylyp, resýrstar shyn máninde basymdyqqa ıe kúrdeli jobalarǵa baǵyttaldy», dep atap ótti Abzal Beısenbekuly.
