Sýret JI kómegimen jasaldy
Kórmede jahandyq iri óndirýshiler jol-qurylys tehnıkasynyń, materıaldar men jabdyqtardyń jańa túrlerin usyndy. Al elordanyń tazalyǵyna jaýapty «Astana Tazalyq» JShS qala kósherin, asfalt joldaryn táýlik boıy tazalaýǵa járdemdesetin, qaýipsizdikti saqtaıtyn jańa ekologııalyq jabdyqtardy kórsetti. Onyń ishinde jasandy ıntellekt sheshimderi óndiris úderisterin jedeldetýge, baqylaý dáldigin arttyrýǵa jáne adamı faktordy tómendetýge múmkindik beredi.
«Astana Tazalyq» seriktestigi tehnıkany paıdalaný bóliminiń basshysy Tımýr Ahmetovtyń aıtýynsha, qala tazalyǵyna jaýapty mekemeniń JI tehnologııasyn engizgenine 3 aıǵa jýyqtapty. Sodan berige deıin ozyq qurylǵy jol boıynda qalǵyp ketken 6 júrgizýshini sol zamatta oıatyp alǵan.
«Astana Tazalyq» JShS basshylyǵy kórmege JI-diń kommýnaldyq saladaǵy múmkindigin kórsetýge kelip otyrǵandaryn aıtty. Iаǵnı osy arqyly eldegi tazalyqqa jaýapty mekemelerdi JI-diń ozyq múmkindikterin paıdalanýǵa shaqyryp otyr.
«Memleket basshysynyń tapsyrmasy boıynsha qazir ekonomıkanyń árbir salasyna jasandy ıntellekt tehnologııalary engizilip jatyr. Qalanyń tazalyǵyna jaýapty mekeme bolǵan soń, biz JI-di kólikterimizge engizýdi uıǵardyq. Jumysshylardyń qaýipsizdigi úshin barlyq JI sheshimderdi bir ekojúıege toǵystyrdyq. Ol úshin árbir kólikke datchık, beınekamera ornatamyz. Negizi, mekeme balansynda 400-ge jýyq tehnıka bar. Onyń ishinde qar tazalaıtyn, qar tıeıtin kólikterden bólek, shaǵyn tehnıkalarymyz saılanǵan. Qazir 100 kólikke beınekamera ornatyp, JI men baılanystyrdyq, basqa kólikterimiz de kóp uzamaı kameramen qamtylady», deıdi mekemeniń bólim basshysy T. Ahmetov.
Bilseńizder, seriktestikte jumysshylar túngi aýysymǵa da shyǵyp, qalany qardan tazalaıdy. Túnde qalada keptelis joq. Al tehnıkalyq maqsattaǵy kóliktiń salmaǵy aýyr, jyldamdyǵy tómen. Mundaı jaǵdaıda júrgizýshiler jolda jıi sharshaıdy, uıqy qysady.
Endi kólikterge ornatylǵan termınal júrgizýshiniń janaryn baqylap otyrady. Eger qalǵyp-múlgip ketken jaǵdaıdy baıqasa, nebári 3 sekýndta júrgizýshini oıatyp alady. Sol sekildi júrgizýshi jyldamdyqty shamadan tys asyrsa, telefonmen sóılesse derek birden basshylyqqa túsedi. Munyń barlyǵyn áýeli júrgizýshiniń, joldaǵy basqa da kólikterdiń, turǵyndardyń qaýipsizdigi úshin jasalǵan qadam dep túsindik.
