Atalǵan sharaǵa «TÚRKSOI» uıymynyń Bas hatshysy Sultan Raev, IýNESKO qamqorlyǵyndaǵy «Mádenıetterdi jaqyndastyrý ortalyǵy» memlekettik mýzeıi dırektorynyń orynbasary Saltanat Áshimova, osy memlekettik mýzeıdiń «Mádenıetter ózara yqpaldastyǵy ortalyǵy» qoǵamdyq birlestiginiń dırektory Úmithan Munalbaeva, Dúnıejúzi qazaqtar qaýymdastyǵynyń Túrkııadaǵy ókili Erjan Ýáıis qatysty.
Bas hatshy S. Raev bul sharanyń Túrki álemi úshin mańyzdylyǵyn aıtyp ótti.
«Alyp aqynnyń eńbekteri adamzatqa tereń oı salyp, óziniń turmysy men bolmysyn zertteýge shabyt beredi. Qazaq akademıginiń eńbekteri tek mádenıet salasymen ǵana shektelmeı ǵylymnyń bar mańyzdy aýmaǵyn keship ótedi», – dedi Bas hatshy.
Oljas Súleımenov vıdeobaılanys arqyly «TÚRKSOI» uıymynyń ózine arnap uıymdastyrǵan sharasyna alǵys bildirip, sálemin joldady. Aqyn uıymnyń bedeli artqan saıyn dúnıejúzilik qoǵamdastyqtyń Túrki halyqtarynyń mádenıeti men tarıhyna degen qyzyǵýshylyǵynyń da ósip jatqanyn baıqaǵanyn jetkizip, ǵalymdardyń endi túrkilerdiń tarıhı yqpaly taqyrybyna bet buratynyna senim bildirdi. Súleımenov «Az ı Iа» kitabynyń 50 jyldyǵyna arnalǵan sharanyń «TÚRKSOI» shańyraǵynda ótkizilip otyrylǵanyna rızashylyǵyn jetkizdi.
