Zertteý Ulybrıtanııadaǵy Esseks ýnıversıteti men Esseks psıhıkalyq densaýlyq seriktestik uıymynyń ǵalymdary Eva Horton, Neıtan Shermerhorn jáne Pol Hanel tarapynan júrgizilgen. Olar erler arasyndaǵy agressııa men ústemdikke qurylǵan dástúrli genderlik túsinikterdiń emosııany tejep, psıhologııalyq kómek alýǵa qalaı áser etetinin taldady.
Ǵalymdar eki kezeńnen turatyn zertteý júrgizdi. Birinshi kezeńge 220 adam (onyń ishinde 66 er adam) qatysyp, olardan agressııa, ústemdik jáne emosııany jasyrý deńgeıin anyqtaıtyn saýalnama alyndy. Nátıjesinde agressıv jáne ústem kózqarasty erler óz sezimin álsizdik dep qabyldaıtyny, al emosııasyn kórsetpeýge tyrysatyny anyqtaldy.
Ekinshi zertteýde 264 er adamnan «emosııalyq qıyndyqtar kezinde kómek suraýǵa daıyn bolar ma ediń?» degen suraq qoıyldy. Emosııasyn tejeıtinder psıhologııalyq kómekke, ne mamandarǵa, ne dostaryna, ne jaqyndaryna júginýge qulyqsyz ekenin kórsetti.
Ǵalymdar muny «janama baılanys» dep sıpattaıdy: toksıkalyq erkektik minez tikeleı emes, emosııany shekteý arqyly kómek suraý yqtımaldyǵyn azaıtady.
Zertteý avtorlary mundaı túsiniktiń qaýipti ekenin aıtady. Sebebi erler arasyndaǵy sýısıd kórsetkishi áıelderden áldeqaıda joǵary, al psıhologııalyq qyzmetterge júginý kórsetkishi tómen.
Mamandar erlerge arnalǵan psıhologııalyq baǵdarlamalarda emosııany kórsetý álsizdik emes, batyldyq ekenin túsindirý mańyzdy deıdi. Sebebi erler óz sezimin basyp tastaý arqyly tek óz densaýlyǵyna zııan keltiredi.
