Foto: pinterest.com
Munaı baǵasy tómendeıdi, biraq ekonomıkalyq ósimge senim kúsheıdi
Saýalnamaǵa qatysýshylardyń boljamynsha, Brent markaly munaıdyń baǵasy aldaǵy jyldary shamaly tómendeıdi. 2025 jyly bir barrel úshin ortasha qun 68,7 dollar, al 2026 jáne 2027 jyldary tıisinshe 63,8 jáne 64,1 dollar deńgeıinde bolady dep kútiledi.
Soǵan qaramastan sarapshylar el ekonomıkasynyń ósimine qatysty kózqarasyn jaqsartqan. IJО́ ósimine jasalǵan jańa boljamdar:
-
2025 jyl – 5,9% (buryn 5,6%)
-
2026 jyl – 4,9% (buryn 4,8%)
-
2027 jyl – 5% (buryn 4,8%)
Inflıasııa boljamy ózgerissiz, bazalyq mólsherleme joǵaryraq bolady
Inflıasııa deńgeıi aıtarlyqtaı túzetilgen joq. 2025 jyldyń sońyna qaraı onyń mólsheri 12,3% deńgeıinde bolady dep paıymdalady. Al 2026 jáne 2027 jyldarǵa jasalǵan boljamdar burynǵydaı: 10% jáne 7%.
Al bazalyq mólsherlemege qatysty sarapshylar pikiri kúsheıgen. Respondentter aldaǵy úsh jylda mólsherleme qazirgi deńgeıge jaqyn, tipti joǵaryraq bolady dep boljaıdy:
-
2025 jyl – 18% (buryn 16,6%)
-
2026 jyl – 16% (buryn 14,8%)
-
2027 jyl – 13% (buryn 12%)
Saýalnamaǵa kimder qatysty?
Bul joly saýalnamaǵa Qazaqstan ekonomıkasynyń basty kórsetkishterin zertteýmen aınalysatyn 14 uıym qatysqan. Olardyń qatarynda:
-
qarjy naryǵynyń kásibı qatysýshylary,
-
zertteý ortalyqtary,
-
halyqaralyq uıymdar,
-
reıtıngtik agenttikter bar.
Ulttyq bank saýalnama nátıjeleriniń retteýshiniń óz boljamyna qatysy joq ekenin erekshe atap ótti. Bul – otandyq jáne halyqaralyq sarapshylardyń naryqqa qatysty táýelsiz baǵasy men kásibı kútýleriniń jıyntyǵy ǵana.
