Fılarmonııa ardagerleri qyzyl kilem ústimen saltanatty túrde júrip ótip, estelik sýretke tústi. Sonymen qatar Almaty qalasy mýzeıler birlestigi men Ulttyq ortalyq mýzeı ujymy fılarmonııa shejiresi men Nurǵısa Tilendıevtiń ómiri jáne shyǵarmashylyǵyna arnalǵan taǵylymdy kórme usyndy. Kórermender tarıhı fotosýretter men sırek materıaldar arqyly fılarmonııanyń 90 jyldyq tarıhymen tanysyp, tyń málimet aldy.
Almaty qalasy ákiminiń orynbasary Abzal Núkenov fılarmonııa ujymyn mereıli belesimen quttyqtap, Memleket basshysy Qasym-Jomart Toqaevtyń arnaıy joldaǵan quttyqtaý hatyn tabys etti.
«Jambyl atyndaǵy Qazaq memlekettik akademııalyq fılarmonııasynyń qurylǵanyna 90 jyl tolýymen quttyqtaımyn! Bul – ulttyq mýzyka óneriniń mereıli belesi. Áıgili Ahmet Jubanov negizin qalaǵan fılarmonııa ǵasyrǵa jýyq ýaqyt ishinde halqymyzdyń rýhanı murasyn damytýǵa, órkenıetimizdiń órisin keńeıtip, qazaqtyń án-kúıin álemge tanytýǵa zor úles qosty. Ult rýhanııatynda aıryqsha iz qaldyrǵan kóptegen tuǵyrly tulǵamyz osy kıeli sahnada óner kórsetti. О́negeli ujym búginde kásibı sheberligin shyńdap, aǵa býynnyń taǵylymdy jolyn jalǵastyryp keledi. Tól mádenıetimizdi pash etip, qalyń kórermenniń ystyq yqylasyna bólenip júrgen fılarmonııa qyzmetkerlerine shynaıy rızashylyǵymdy bildiremin» delingen Prezıdenttiń quttyqtaý hatynda.
Mereıtoılyq jyldy qorytyndylaǵan keshte fılarmonııanyń barlyq shyǵarmashylyq ujymy óner kórsetti. Olardyń qatarynda, N.Tilendıev atyndaǵy folklorly-etnografııalyq akademııalyq «Otyrar sazy» orkestri, T.Ábdirashev atyndaǵy Memlekettik akademııalyq sımfonııalyq orkestr, Qazaqstannyń úrmeli aspaptar orkestri, B.Baıqadamov atyndaǵy Memlekettik hor kapellasy, Memlekettik klassıkalyq gıtarashylar kvınteti, Ǵazıza Jubanova atyndaǵy Memlekettik ishekti aspaptar kvarteti, Memlekettik qaraǵaıly-úrmeli aspaptar kvınteti, sonymen qatar belgili solıster, dombyrashylar men pıanıster bar. Olardyń óneri kesh ajaryn asha tústi.
Qazaq án-kúılerimen qatar, álemdik klassıkanyń injý-marjandary usynyldy. Kórermen Nurǵısa Tilendıevtiń «Mahambet», «Aqqý» kúıleri men «О́z elim», «Qustar áni», «O, týǵan jer» ánderin, Abaıdyń «Aıttym sálem, Qalamqas» shyǵarmasyn tyńdady. Sondaı-aq M.Tólebaevtyń «Birjan – Sara» operasyndaǵy Merekelik bı, Bethovenniń 9-sımfonııasynan úzindi oryndaldy. Dombyrashylardyń «Balamıshka», «Álqıssa» kúı tartysy men eki fortepıanoǵa arnalǵan kúrdeli týyndylary keshtiń kórkemdik deńgeıin arttyrdy.
ALMATY
