Memleket basshysy Ońtústik Qazaqstanǵa jumys saparymen bardy

ShYMKENT. 8 tamyz.  Búgin memleket basshysy Nursultan Nazarbaev Ońtústik Qazaqstan oblysyna jumys saparymen bardy. Ol sapar aıasynda oblystyq máslıhattyń sessııasyna qatysyp, depýtattarǵa oblystyń jańa ákimi Beıbit Atamqulovtyń kandıdatýrasyn usyndy. Depýtattar usynysty bir aýyzdan maquldady. Bul egemen.kz habarlady. Qazaqstan prezıdenti burynǵy ákim Asqar Myrzahmetov úlken jumys atqarǵanyn, nátıjesinde óńir ekonomıkasy tabysty damyp, áleýmettik nysandar qurylysy belsendi júrgizilip, qyzmet kórsetý salasy júıeli túrde jaqsaryp kele jatqanyn atap ótti. Elbasy Asqar Myrzahmetovtiń tájirıbesi men bedeli qazirgi ýaqytta eldiń jetekshi saıası kúshi bolyp sanalatyn «Nur Otan» partııasynyń basshylyǵynda qajet ekenin aıtty. Prezıdent oblystyń damýyna dástúrli túrde zor kóńil bólinetinine, onyń basshysyna aıryqsha jaýapkershilik júkteletinine nazar aýdardy. Sonymen qatar, Elbasy óńir aktıvimen kezdesý ótkizip, onyń barysynda oblystyń jańa ákimin tanystyrdy. Memleket basshysy Beıbit Atamqulovtyń túrli basqarý salalaryndaǵy jumys tájirıbesin, bilim deńgeıiniń joǵarylyǵyn atap ótti jáne óńirdiń aldyna qoıǵan mindetterdi onyń ıgere alatynyna senim bildirdi. Nursultan Nazarbaev ekonomıkadaǵy ahýaldyń kúrdelenýine baılanysty qolda bar qarajatty paıdalaný tıimdiligin arttyrýǵa basymdyq beriletinin, bul barlyq deńgeıdegi ákimderdiń mindeti ekenin atap kórsetti. Memleket basshysy atap ótkendeı, respýblıkada daǵdarystyq qubylystardy eńserý úshin júıeli sharalar qabyldanýda. Elde júrgizilip jatqan ındýstrııalandyrý ekonomıkanyń ornyqtylyǵyn kúsheıtýge, shıkizattyń álemdik baǵasyna táýeldilikti azaıtýǵa, shaǵyn jáne orta bıznestiń úlesin arttyrýǵa baǵyttalǵanyn aıtty. «Nurly jol» baǵdarlamasy da daǵdarysqa qarsy saıasattyń ilkimdi quraly bolyp sanalady. Qazaqstan Prezıdenti oblystyń áleýetin júzege asyrý kerektigin ataı otyryp, birqatar negizgi mindetter qoıdy. Olardyń qatarynda tabıǵı resýrstardy paıdalanýdy qosa alǵanda, ónerekásipti damytý, ýran klasterin qalyptastyrý, shaǵyn jáne orta kásipkerliktiń órkendeýi úshin jaǵdaıdy odan ári jaqsartý, agroónerkásip kesheniniń tıimdiligin arttyrý jáne paıdalanylmaıtyn jer alqaptaryn azaıtý máseleleri bar. Sondaı-aq, Memleket basshysy áleýmettik ózekti, sonyń ishinde úsh aýysymdyq mektepterdi joıý, balalardy mektepke deıingi mekemelermen qamtý aıasyn ulǵaıtý máselelerin sheshý isin jalǵastyrýdy tapsyrdy, biraq bul rette shyǵystardyń ornymen jumsalý qaǵıdatyn ustaný kajettigin aıtty. Baqtııar Taıjan. Derek, sýret: egemen.kz.