foto: olympic.kz
Orta salmaqta eki dúrkin álem chempıony jáne 2004 jylǵy Olımpıada oıyndarynyń kúmis júldegeri dańqty otandasymyz Olımpıadalyq sport túri boıynsha halyqaralyq federasııany basqaratyn tuńǵysh qazaqstandyq atandy.
Gennadıı Golovkın osy jaýapty qyzmeti barysynda eńserýdi kózdep otyrǵan josparyn ortaǵa saldy.
«Sizderdiń qoldaýlaryńyzben World Boxing uıymyna degen senimdi qalpyna keltirý úshin barymdy salamyn. Birlese otyryp halyqaralyq olımpıadalyq komıtettiń tolyqqandy maquldaýyna qol jetkize alamyz. Bokstyń tek Los-Anjeles-2028 Olımpıadasynda ǵana emes aldaǵy barlyq Olımpıada oıyndaryndaǵy ornyn nyq qalyptastyramyz», dedi ol.
Keler jyldan qoıylǵan maqsattardy júzege asyrýǵa kirisetinin aıtqan otandasymyz World Boxing federasııasynyń prezıdenti retinde 4 basty ustanymdy aıqyndaǵanyn tilge tıek etti.
«Sportshylar – basty orynda, ekinshi – ádildik, úshinshi – ınnovasııalar, tórtinshi – qarjylyq turaqtylyq jáne damý. Ár qadam jaıynda uıym múshelerin habardar etip otyramyz. Men adal, nátıjeli eńbektenetin basshylyq quramdy jasaqtaımyn. Kóshbasshy bolý adamdardyń ústinen qarap turý emes, olarmen birge bolý. Endi áreket etetin ýaqyt keldi», dedi Gennadıı Golovkın.
Buǵan deıin Memleket basshysy Qasym-Jomart Toqaev Gennadıı Golovkındi World Boxing halyqaralyq federasııasynyń prezıdenti bolyp saılanýymen quttyqtaǵanyn habarlaǵan bolatynbyz.
