Oqý-aǵartý mınıstrliginiń málimetinshe, zertteý dástúrli PISA ádistemesine negizdelgen jáne oqý saýattylyǵy, matematıka, jaratylystaný ǵylymdary boıynsha fýnksıonaldyq saýattylyqtyń negizgi daǵdylaryn baǵalaıdy. Sonymen qatar bul zertteý arqyly bilim berý uıymdaryna syrtqy baǵalaý júrgiziledi. Onyń nátıjeleri oqýshylardyń oqý úlgerimine áser etetin negizgi faktorlardy anyqtaýǵa baǵyttalǵan.
«Mektepterge arnalǵan PISA zertteýi jyl saıyn júzege asyrylady. Dástúrli PISA zertteýinen aıyrmashylyǵy, ol ár mektep boıynsha syrtqy baǵalaý júrgize otyryp, nátıjesinde bilim berý uıymdarynyń basshylaryna oqý oryndarynyń kúshti jáne álsiz jaqtaryn anyqtaýǵa múmkindik beretin esepter joldanady. Bul árbir bilim berý uıymyna bilim berý prosesin jaqsartýǵa yqpal etetin qajetti sharalardy qabyldaýǵa kómektesedi», dep atap ótti Bilim berý salasynda sapany qamtamasyz etý komıtetiniń tóraǵasy Serik Áshirov.
Aıta ketý kerek, «Mektepterge arnalǵan PISA» zertteýin Ekonomıkalyq yntymaqtastyq jáne damý uıymy júrgizedi. Oǵan 2021-2024 jyldar aralyǵynda elimizdiń 3000-nan astam bilim berý uıymdary qatysty. Zertteýdiń Qazaqstandaǵy úılestirýshisi – A. Baıtursynuly atyndaǵy ulttyq zertteýler jáne bilimdi baǵalaý ortalyǵy.
