Baýyrjan Baıbek Almaty qalasynyń ákimi bolyp taǵaıyndaldy

ALMATY. 9 tamyz. Memleket basshysy Nursultan Nazarbaev Almaty aktıvine qalanyń jańa ákimi – Baýyrjan Baıbekti tanystyrdy. Bul týraly Aqordanyń baspasóz qyzmetine silteme jasaǵan egemen.kz tilshisi habarlady. Bul laýazymǵa Baýyrjan Baıbek taǵaıyndalsa, Ahmetjan Esimov basqa qyzmetke aýysýyna baılanysty qala ákimi qyzmetinen bosatyldy. Baýyrjan Baıbek buǵan deıin «Nur Otan» partııasy Tóraǵasynyń birinshi orynbasary qyzmetin atqardy. Baýyrjan Qydyrǵalıuly Baıbek 1974 jyly 19 naýryzda Almaty qalasynda týǵan. «Bolashaq» baǵdarlamasy boıynsha Germanııadaǵy Gete ınstıtýtyn nemis tiliniń mamany (Bremen qalasy, 1995), «Bolashaq» baǵdarlamasy boıynsha Lıýbek qalasyndaǵy joǵary mektepti pedagog (1998), Ortalyq Azııa ýnıversıtetin halyqaralyq ekonomıst (2002) mamandyqtary boıynsha bitirgen. «Hattamalyq is-sharalardy qamtamasyz etý boıynsha tájirıbelik nusqaýlyq» (2007, eki tilde), «Qazaqstan Respýblıkasynyń memlekettik hattamasy» (2010) kitaptarynyń avtory, «Qazaqstan Respýblıkasynyń memlekettik hattamasy» (2004) kitabynyń birlesken avtory, «Prezıdenttiń bir jyly» (2006, 2007) kitabynyń qurastyrýshysy, 6 maqalanyń, sonyń ishinde «Memlekettiń syrtqy saıası qyzmetindegi hattama» (2010), «Sheteldik memleketterdiń hattamalyq qyzmetin ınstıtýttandyrýdyń keıbir aspektileri týraly» (2010) jáne taǵy basqa jarııalanymdardyń avtory. B.Baıbek 1999 jyldan - Qazaqstannyń Germanııadaǵy Bas konsýldyǵynyń referenti, attashesi - GFR-daǵy Qazaqstan elshiligi ekonomıkalyq bóliminiń úshinshi hatshysy, 2002 jyldan - Prezıdent Ákimshiligi júıeli zertteýler ortalyǵynyń sarapshysy, 2003 jyldan - Prezıdent hattamasynyń aqparat pen taldaý sektorynyń meńgerýshisi, 2004 jyldan - bas ınspektory, 2006 jyldan - hattama jetekshisi, 2009 jyldyń tamyz aıynan Prezıdent Ákimshiligi jetekshisiniń orynbasary bolyp qyzmet atqardy. 2013 jylǵy 1 qańtarda «Nur Otan» partııasy Tóraǵasynyń birinshi orynbasary bolyp taǵaıyndaldy. Ol Qazaqstan Prezıdentiniń halyqaralyq «Bolashaq» stıpendııasy stıpendıattary qaýymdastyǵy keńesiniń tóraǵasy (2008 jyldan),  Qazaq gýmanıtarlyq zań ýnıversıteti Qamqorshylyq keńesinińtóraǵasy (2010 jyldan), S.D.Asfendııarov atyndaǵy qazaq ulttyq medısına ýnıversıteti Qamqorshylyq keńesiniń (2010 jyldan) múshesi boldy. Talǵat Súıinbaı. Derek, sýret: egemen.kz.