Ulttyq kitaphanada órbigen kásibı pikir almasý alańyna elimizdiń aıtýly ǵalymdary men kitaphanashylary, birneshe memleketten arnaıy kelgen jetekshi bıblıograftar qatysty. Ulttyq kitaphananyń 115 jyldyǵyna, Alash qaıratkeri Mirjaqyp Dýlatulynyń 140 jyldyq mereıtoıyna, elimizdiń kitaphanataný salasynyń kórnekti mamany Roza Berdiǵalıevaniń 80 jasqa tolýyna oraı uıymdastyrylǵan is-sharada ulttyq bıblıografııanyń búgingi betalysy men bolashaǵy talqylanyp, salaǵa serpin beretin birneshe usynys aıtyldy.
Otandyq bıblıografııanyń ınstıtýsıonaldyq negizderi men rýhanı jańǵyrýdaǵy mańyzyna toqtalǵan ǵalymdar qazirgi kezeńde derekterdi tolyq sıfrlyq formatqa kóshirý, ulttyq elektrondy katalog qurý jáne bıblıografııalyq derekterdi halyqaralyq standarttarǵa sáıkestendirý qajettigin atap ótti. Budan bólek, derekterdi birizdendirý ári jahandyq aqparattyq júıelermen ıntegrasııalaý, ádistemelik qoldaýdy kúsheıtý, mamandar daıarlaý júıesin jetildirý máseleleri de kitaphanashylar nazarynan tys qalmady.
Is-sharada Qazaqstan Ulttyq kitaphanasynyń dırektory, Qazaqstan kitaphanalar odaǵynyń tóraǵasy Ǵazıza Nurǵalıeva, «Mektep» baspasynyń bas dırektory Erlan Satybaldıev, IFLA bıblıografııa seksııasynyń tóraǵasy Rehab Of (Aleksandrııa kitaphanasy, Mysyr), Qytaı Ulttyq kitaphanasynyń ádebıetti jınaqtaý jáne katalogteý bóliminiń meńgerýshisi Hýan Sze, áleýmettaný ǵylymdarynyń doktory Sýat Beılúr, «Alash book» baspa úıiniń jetekshisi Alma Tursyn, Respýblıkalyq ǵylymı-pedagogıkalyq kitaphananyń dırektory Álııa Saıdembaeva baıandama jasady. Mamandar tájirıbe almasý, kásibı baılanysty nyǵaıtý, zamanaýı trendterdi birlese taldaý máseleleriniń arnasyn keńeıtýdi qajet dep esepteıdi. Ásirese sıfrlyq transformasııa, derekterdi ıntellektýaldy óńdeý, ınklıýzıvti aqparattyq resýrstar qalyptastyrýdyń mańyzy zor. Sarapshylar pikirinshe, jasandy ıntellekt quraldaryn bıblıografııalyq úderisterge engizý arqyly sala tıimdiligin arttyrýǵa bolady.
«Ulttyq bıblıografııa – el jadynyń, mádenı muranyń, tarıhı derektiń negizi. Onyń damýy men júıelenýi ulttyq ǵylym men bilimniń ilgerileýine tikeleı yqpal etedi. Konferensııada Ulttyq kitaphana janynan bıblıografııaǵa arnalǵan ǵylymı ortalyq qurý, damý strategııalaryn ázirleý, halyqaralyq seriktestik pen kásibı kadrlar daıarlaýdy júıeleý sekildi naqty usynystardy ortaǵa saldyq. Qazaq bıblıografııasynyń ǵasyrlyq jolyn barlaǵan basqosýda kitap murasyn júıeleýge arnalǵan birneshe mańyzdy basylymnyń tusaýy kesildi. Solardyń qatarynda Mirjaqyp Dýlatuly qurastyrǵan «Qazaq tilinde basylǵan kitaptar kórsetkishi (1926–1927)», «Qazaqstan bıblıografııasy men kitaphana isi», «Ulttyq kitaphana qoryndaǵy dástúrli kartotekalyq aqparattar (1921–2001): bıblıografııalyq sholý anyqtamalyǵy» jınaqtary bar. Bul basylymdar – tarıhı derek pen rýhanı murany ushtastyratyn qundy bıblıografııalyq eńbek», deıdi Ulttyq kitaphananyń dırektory Ǵazıza Nurǵalıeva.
Konferensııa aıasynda «Ǵasyrlyq jol: qazaq bıblıografııasynyń shejiresi» atty arnaıy kórme uıymdastyrylyp, sırek qorlardan alynǵan basylymdar, katalogter men bıblıografııalyq quraldar jurtshylyq nazaryna usynyldy. Kórmede ulttyq bıblıografııanyń qalyptasý kezeńderinen bastap búginge deıingi damý satylary kórinis tapqan.
ALMATY
