Foto: Aqorda
Energetıka, ónerkásip kooperasııasy, aýyl sharýashylyǵy, IT, bilim berý jáne medısına salalaryndaǵy birlesken jobalardy iske asyrýǵa basa nazar aýdaryldy.
«Qazaq pen túrikmen – ejelden dostyǵy jarasqan týys halyqtar. Bizdiń tarıhymyz jáne maqsat-muratymyz – ortaq, mádenı-rýhanı qundylyqtarymyz – bir. Biz Túrikmenstanmen yntymaqtastyqty tatý kórshilik jáne ózara qoldaý rýhynda barynsha nyǵaıtýǵa aıryqsha mán beremiz. Jarqyn bolashaqqa birge qadam basý úshin kúsh jumyldyramyz. Baýyrlas halyqtarymyzdyń ıgiligi úshin strategııalyq seriktestikti nyǵaıta túsemiz. Men buǵan kámil senemin», dedi Memleket basshysy.Qazaqstan Prezıdenti eki el arasynda barlyq deńgeıde belsendi ári tabysty baılanys ornaǵanyn atap ótti. Úkimetterimiz júıeli jumys júrgizip, vedomstvoaralyq baılanys nyǵaıyp keledi. Elderimiz kópjaqty qurylymdar aıasynda nátıjeli qarym-qatynas jasaıdy.
Memleket basshysynyń aıtýynsha, Astana men Ashhabadtyń óńirlik, halyqaralyq kún tártibindegi kóptegen másele boıynsha kózqarastary men ustanymdary uqsas.
Qasym-Jomart Toqaev kelissózder barysynda saýda-ekonomıkalyq yqpaldastyqqa aıryqsha nazar aýdardy. Sońǵy 5 jylda ózara saýda kólemi 4 eseden asyp, jarty mıllıard dollarǵa deıin ulǵaıdy.
Qazaqstanda túrikmen kapıtaly bar 140-qa jýyq kompanııa tabysty jumys isteıdi. Osy arqyly atalǵan kásiporyndar ekonomıkalyq baılanysty nyǵaıtýǵa zor úles qosyp keledi. Qazaqstannyń Túrikmenstanǵa quıǵan ınvestısııasy 120 mıllıon dollardan asty.
Memleket basshysy mádenı-gýmanıtarlyq baılanystyń damý qarqynyna toqtaldy. Prezıdent eki eldiń mádenıet kúnderin alma-kezek ótkizý, kórnekti qaıratkerlerdiń eskertkishterin ashý sharalary qos halyqtyń mádenı-rýhanı murasyna aıtarlyqtaı úles qosady dep sanaıdy.
Serdar Berdimuhamedov Qazaqstan men Túrikmenstandy Ortalyq Azııadaǵy strategııalyq seriktes memleketter dep atady.
«Memleketterimizdi urpaqtan urpaqqa amanat bolyp, kózimizdiń qarashyǵyndaı saqtap kele jatqan ortaq tarıhı tamyrlastyq, mádenı-rýhanı uqsastyq, salt-dástúrimizdiń jaqyndyǵy sekildi qundylyqtar biriktiredi. Saıası-dıplomatııalyq salada Túrikmenstan men Qazaqstan jahandyq kún tártibindegi ózekti máseleler boıynsha syndarly yqpaldastyq ornatqan. Atap aıtqanda, beıbitshilik pen qaýipsizdikti saqtaý, energetıkalyq turaqtylyqty nyǵaıtý, kólik baılanysyn ilgeriletý, ornyqty damý maqsattaryna qol jetkizý jáne klımat ózgerisine qarsy kúres máseleleri boıynsha ustanymdarymyz ortaq», dedi Túrikmenstan Prezıdenti.
