Baıqaýdyń maqsaty – óskeleń urpaqty kitap oqýǵa, halqymyzdyń rýhanı asyl murasyna degen súıispenshiligin oıatý oqýshylardyń shyǵarmashylyq pen zııatkerlik qabiletin damytyp, qazaq halqynyń batyrlyq epostaryn nasıhattaý. Jyr dodasynyń irikteý kezeńi qyrkúıek aıynda ótken edi. Jobanyń avtory Abaı Orazdyń aıtýynsha, óńirdi aralap kitapqumar, zerdeli jetkinshekterdi izdegen. Saıysqa Ulytaý oblysynan 4–16 jas aralyǵyndaǵy 118 bala qatysty. Baıqaýdyń talaby boıynsha qatysýshylar «Alpamys batyr» jyrynyń mazmunyn tolyq bilip, óz jasyna saı jyrdan úzindi jatqa aıtýy qajet. Sondaı-aq jyrdaǵy kónergen, tarıhı sózderdiń maǵynasyn ashyp, mazmunǵa baılanysty qoıylǵan suraqtarǵa jaýap beredi.
«Alpamys batyr» jyrynyń túrli nusqasy bar. Sondyqtan saıysqa qatysýshylar 1990 jyly «Jalyn» baspasynan shyqqan «Tórt batyr» kitabyna kirgen «Alpamys batyr» jyryn jattady. Jas ereksheligine sáıkes jyr jattaý tórt topqa bólindi: 4–7 jas (50–80 jol), 8–11 jas (100–130 jol), 12–15 jas (150–170 jol), 16–20 jas (200–230 jol). Jetkinshekter ónerin belgili qalamger, Qazaqstannyń eńbek sińirgen qaıratkeri Baıanǵalı Álimjanov bastaǵan qazylar alqasy baǵalady.
Baıqaý barysynda ár jas shamasyndaǵy balalar óte belsendilik tanytty. Olar jyrdy aıtqanda obrazǵa kirip, túrlendirip, tyńdaýshylaryn úlken áserge bóledi. Aıtalyq, jańaarqalyq Álı Amanjan atty bala «Alpamys batyr» jyryn tolyq jattap, jurtty tańǵaldyrdy. Eń kishkentaı qatysýshy Sátbaev qalasynan kelgen tórt jasar Aızere Ábilqasymǵa kórermen súısine qarady. 5–7 jas qatysýshylar arasynda Balshaıym Kórshihan, Ǵalymjan Baıshat, Qaýqar Bashpaı, Kórkem Dastan esimdi balalar baldaı tilimen, saq jaýyngeriniń kıimin kıip sahnaǵa jarqyrap shyǵyp, eldi aýzyna qaratty.
Sondaı-aq mádenı sharada belgili jyrshy Baıanǵalı Álimjanov «Manas» jyrynan úzindi aıtsa, tanymal ánshi Serik Ospanov Aqtamberdi termesin tógiltti.
Baıqaýdyń jeńimpazdary men júldegerlerine I, II, III dárejeli dıplom, sondaı-aq yntalandyrý syılyqtary berildi. Júlde jas ereksheligine sáıkes taǵaıyndaldy. О́ńirdegi mesenattar men ulttyq ónerdi qoldaýshy azamattar qosymsha júlde taǵaıyndady.
Ulytaý aýdanynyń Sheńber aýylynan kelgen Isa Shambulhan (8 jas) men Tańsholpan Dýlatqyzy (16 jas) bas báıge ıelendi. Balalardy baptaǵan ár mektepten kelgen jetekshiler de oljaly oraldy. Olarǵa Baıanǵalı Álimjanov óz qoltańbasymen «400 tátti taqpaq» pen «Abylaıhan men batyrlar» kitabyn tartý etti.
Ulytaý oblysy
