«Balbal tastar ejelgi túrkilerdiń jerleý jáne eske alý dástúrleriniń mańyzdy bóligi bolǵan. Olar kóbinese erjúrek batyrlar men jaýyngerlerdi beınelegen. Al áıel beınesindegi bul balbal tas – sol dáýirde áıeldiń de qoǵamda erekshe oryn alǵanynyń aıǵaǵy. Osy tastyń kómegimen biz VI–VII ǵasyrlardaǵy túrki qoǵamyndaǵy áıel mártebesin, rýhanı mádenıetin jáne analyq obrazdyń qadirin tereń uǵyna alamyz» deıdi Almaty oblysy «Anaǵa qurmet» mýzeıiniń meńgerýshisi Gúlnár Ábish.
«Anaǵa qurmet» mýzeıindegi eń qundy jádigerdi «Qurmet», «Otan» ordenderiniń ıegeri, Qazaqstannyń eńbek sińirgen qaıratkeri, sýretshi Amandos Aqanaev bıylǵy qyrkúıek aıynda arnaıy tabys etken. О́ner tarlany mýzeı jumysyna oń baǵasyn bere kele, ana taqyrybyn arqaý etken birneshe qundy kartınasyn syıǵa tartqan. Sonymen qatar jeke qoryndaǵy teńdesi joq, óte sırek kezdesetin áıel beınesindegi balbal tasty tabystaǵanyn mýzeı qyzmetkerleri aıryqsha maqtan tutady.
«Bir kúni maǵan habarlasqan tanysym osyndaı erekshe balbal tas tabylǵanyn aıtty. Kórgen sátte-aq onyń tarıhı jáne rýhanı mańyzyn túsindim. Alaıda ol kezde ony alýǵa múmkindigim bolmady. Soǵan qaramastan, ózimniń birneshe qymbat
týyndylarymdy satyp, osy balbal tasty alýǵa sheshim qabyldadym. Bul men úshin jaı ǵana tas emes edi, ol ananyń rýhyn, áıeldiń máńgilik meıirimin beıneleıtin qasıetti belgi sekildi kórindi.
Osy jádiger meniń sheberhanamda 15 jyldan astam ýaqyt boıy saqtaldy. Keıin «Anaǵa qurmet» mýzeıi ashylǵanyn estip, osy tasty murajaıǵa syıǵa tarttym. Bul – meniń anama degen alǵysym men qurmetimniń belgisi. Anam da sheber edi. О́z qolymen jasaǵan birneshe jumysty da mýzeıge tapsyrdym. Osy arqyly men analardyń eńbegin, rýhyn jáne olardyń adamzat tarıhyndaǵy ornyn ulyqtaǵym keldi», deıdi qundy jádigerdi tabystaǵan qylqalam sheberi Amandos Átibekuly.
Osy kúni boıy 1 metr, salmaǵy 500 kelilik áıel beınesindegi kóne jádiger «Anaǵa qurmet» mýzeıiniń aldynan oıyp oryn alǵan.
Almaty oblysy
