Bas áskerı prokýratýra men Qarjy naryǵyn retteý jáne damytý agenttigi ózara kelisimge qol qoıyp, birlesken oqý is-sharalaryn ótkizýge ýaǵdalasty. Qujat qarjylyq saýattylyqtyń negizderin úıretý jáne qarjy operasııalaryna qatysty táýekelderdiń aldyn alý boıynsha júıeli jumysty kózdeıdi.
Bas áskerı prokýratýra aıqyndaǵan mindetterdi júzege asyrý, sondaı-aq áskerı qyzmetshiler arasynda joǵary deńgeıdegi qarjylyq mádenıetti qalyptastyrý – Ulttyq ulan qyzmetiniń basym baǵyttarynyń biri.
Is-sharaǵa Aqmola garnızony áskerı prokýratýrasynyń aǵa prokýrorlary – ádilet maıory Erlan Qonarov jáne ádilet kapıtany Dıas Jumajan qatysty. Sonymen qatar qarjy naryǵyn retteý basqarmasynyń bas mamany Ińkár Altaeva baıandama jasady. «Amanat» partııasynyń ókili Dýlat Myńbaev ta qarjylyq mádenıet pen áleýmettik qorǵaýǵa qatysty óz kózqarasymen bólisti.
Qatysýshylar áskerı qyzmetshilerdi zamanaýı qarjylyq quraldar jóninde der kezinde habardar etý, alaıaqtyq shemalardan qorǵaný joldaryn túsindirý jáne jeke qarajatty tıimdi basqarý daǵdylaryn qalyptastyrýdyń mańyzdylyǵyn atap ótti. Mundaı sabaqtar áskerı ortadaǵy jalpy quqyqtyq jáne ekonomıkalyq bilimniń artýyna yqpal etedi.
Atalǵan oqý sabaǵy quqyqtyq tártip áskeriniń jeke quramynyń qarjylyq saýattylyǵyn arttyrýǵa jáne qarjylyq quraldardy tıimdi paıdalanýdy damytýǵa baǵyttalǵan mańyzdy qadam boldy.
