Foto: amanatpartiasy.kz
36 jastaǵy Medet Bekjanov Táńirbergen aýylyna «Dıplommen – aýylǵa» baǵdarlamasy boıynsha barǵan. Atalǵan aýylda eńbek jolyn mýzyka pániniń muǵalimi bolyp bastaǵan Medet Bekjanov qoǵamdyq isterde belsene kózge túsip, 2022 jyly aýyl ákimi bolyp saılanǵan. Táńirbergen aýylynyń ákimi «Qazaqstan» ulttyq arnasynyń «Ashyq alań» baǵdarlamasynda qyzmet joly týraly qyzyqty málimettermen bólisti.
«Aýylǵa baryp, baspanaly bolýdy kózdedim. Armanym oryndalyp, otbasyn da qurdym. Sondaǵy balabaqshada mýzykadan bilim bere júrip, aýdannyń mádenı is-sharalaryna belsene aralastym. Sondaı-aq ózim qyzmet etken balabaqshada meńgerýshi boldym. 2022 jyly aýyl ákimderin saılaý reformasyna saı men de básekege tústim. Qarsylasym aýyldyń baıyrǵy turǵyny boldy. Saılaý naýqanynda arnaıy baǵdarlamamdy jarııaladym, tipti halyqqa beıneúndeý túsirdim. Nátıjesinde men jeńiske jettim», dedi Medet Bekjanov.
Aýyl ákiminiń aıtýynsha, naǵyz jumys saılaýdan keıin bastalǵan. Ol búginde halyqqa bergen ýádelerin kezeń-kezeńimen oryndap keledi. Isker ákim búginge deıin Táńirbergen aýylyna mıllıondaǵan somaǵa ınvestısııa tartqan.
«Aýylymyz Sarjansaı, Keńsahara eldi mekenderinen turady. Saılaý barysynda Keńsahara aýylyna uıaly baılanys júıesin ornatýǵa ýáde bergen edim. Sol ýádemde turyp, jergilikti kásip ıelerin tarta otyryp, halyq suranysyn oryndadyq. Sonymen birge, aýylǵa kásipkerlerdi jumyldyryp, qosymsha balabaqsha saldyq. «Aýyl amanaty» baǵdarlamasy aıasynda 345 mln teńge ınvestısııa tartyp, 50-den astam jańa jumys ornyn ashtyq. Dástúrli mal sharýashylyǵynan bólek saıajaı ashyp, jylyjaı isin jolǵa qoıdyq. Aýyl ónimderi aýdanda da satylyp jatyr. Jergilikti halyq 20-dan astam ónimdi aýylda óndirip, ózin-ózi qajetti azyq-túlikpen qamtyp otyr», dedi aýyl ákimi.
Medet Bekjanov óz sózinde aýyl ákimderiniń quzyretin naqtylaý bastamasyn da kóterdi.
Aıta keteıik, 28 qarasha kúni Astanada Memleket basshysynyń qatysýymen aýyl ákimderiniń dıalog-platformasy ótti.
Jıynda Prezıdent aýyl ákimderiniń ókilettikterin naqtylaý jóninde tapsyrma berdi.
