Foto: e-auction.e-qazyna.kz
Aýksıon E-Qazyna portalynda 26 jeltoqsan kúni Astana ýaqytymen saǵat 11:00-de ótedi.
«Baısat» bazarynyń bastapqy baǵasy 26 mlrd 706 mln teńge bolyp belgilendi.
Aıta keteıik, «Baısat» kóterme-bólshek saýda ortalyǵy» JShS-degi úles alǵash ret qarasha aıynda satylymǵa qoıylǵan edi. Alaıda sol kezde saýda bastalar sátte obekt boıynsha tirkelgen qatysýshylar bolmaǵandyqtan aýksıon ótpeı qalǵan. Jalpy aýmaǵy 4 221,4 sharshy metr bolatyn úsh nysannan jáne 1,4 gektar jerden turatyn «Baısat» bazarynyń bul bóligi bir-birimen affılıırlengen eki kompanııanyń – «QazGerStroı» birlesken kásiporny» JShS men Astana Finansial Group JShS-niń menshiginde bolǵan. 2024 jyldyń qańtarynda Almaty prokýratýrasy bul úlesti memleket menshigine qaıtardy. Buǵan deıin Qaırat Satybaldy sotqa deıingi tergeý aıasynda «Baısat» bazarynyń negizgi bóligin memleketke óz erkimen qaıtarǵan edi. Sondaı-aq ol 650 mlrd teńgeni memleketke qaıtarǵan.
2022 jyldyń naýryzynda Qaırat Satybaldy shetelge ushyp ketpek bolǵan kezde ustaldy.
Oǵan qatysty qylmystyq is qozǵalyp, keıin birneshe bap boıynsha kináli dep tanyldy. Sot ony alty jylǵa bas bostandyǵynan aıyrý jazasyna kesip, múlkin tárkiledi, sondaı-aq 10 jyl boıy memlekettik qyzmette jáne ulttyq kompanııalarda laýazymdy qyzmet atqarý quqyǵynan aıyrdy. Dáleldengen aıyptaýlardyń qatarynda «Qazaqtelekom» AQ-na 12 mlrd teńgeden astam materıaldyq zalal keltirý jáne «Kólik qyzmeti ortalyǵy» AQ múlkin ysyrap etý bar.
Úkim shyǵarylar aldynda Satybaldy medıasııa aıasynda eki kelisimge qol qoıyp, óz kinásin moıyndap, keltirilgen zalaldy ótegen. Sondaı-aq onyń burynǵy jubaıy Gúlmıra Satybaldyǵa qatysty úkim jarııalanǵan edi. О́tken jyldyń mamyr aıynda ol alty jylǵa bas bostandyǵynan aıyrylǵan, keıin jazasy uzartyldy.
