Buıyrǵany – kúmis pen qos qola

Ulttyq quramanyń úz­digi Sofıa Berýl­seva (+68 kg) fınaldyq sa­ıys­ta súrinip, kúmis medaldy qanaǵat tutty. Sońǵy saıysta Germanııa sportshysy Iohanna Kolena Knırge ese jiberdi.

– Álem chempıonatynyń kúmis medali de az tabys emes. Degenmen Ánuranymyzdy shyrqatqym kelip-aq edi. 2017 jyly jastar arasynda ótken álem chempıo­natynda top jarǵanda eresekter sapynda da osy bıigime shyǵamyn dep ýáde etken edim, buıyrǵany osy boldy. Nemis qyzymen tartysta qobaljyp, asyǵyp ketkendeımin. Álem chempıony ataǵynyń buıyrmaýy áli de shyńdala túsýdi ańǵartady. Ázirlikti kúsheıtip, kelesi jyly bolatyn dodalarda barymdy salamyn, – dedi talantty sportshy.

Elimizdiń karate sportynyń tarıhynda S.Berýlseva eń tabysty sportshylarynyń kóshin bastap tur. 2016 jyly jas­tar arasynda Azııa chempıo­ny atandy, 2021 jyly Tokıo Olım­pıadasynyń qola medalin oljalady. 2022 jyly Dúnıejúzilik oıyndardyń, sonymen qatar Islam ynty­maqtastyǵy oıyn­darynyń jeńim­pazy boldy. 2023 jyly jazǵy Azııa oıyndarynda top jardy.

Kaırdegi álem chempıonatynda Ásel Qanaı qola júlde ıelen-di. Kýmıteden 61 kg salmaqta synǵa túsken otandasymyz toptyq kezeńde týnıstik Vafa Mahjýbty yǵystyryp, ekinshi aınalymda úndistandyq Alı Hanıdy aıqyn basymdyqpen jeńdi. Úshinshi jekpe-jeginde shveısarııalyq Nına Radjenovıchten, odan keıin mysyrlyq Álı Nýrsennen basym túsken edi. Shırek fınalda qytaılyq Gong Lıge ese jibe­rip, qola júlde úshin tartysta ýkraınalyq Oleksandra Sholo­hovany 3:2 esebimen utty.

Erler dodasynda Dıdar Ámir­áli (67 kg) qola medal enshiledi. Otandasymyz Muhammed О́z­de­mır (Týnıs), О́zer О́mir Ab­dýrahım (Túrkııa), Ýılıams Jodı (Ońtústik Afrıka), Álı Elsavıdi (Mysyr) jeńdi. Shırek fınaldyq saıysta marokkolyq Saıd Ýbaıaǵa ese jiberdi. Qola medal jolyndaǵy saıysta chılılik qarsylasy Freıre Fýentes Tomas ereje buzyp, jarystan shettetildi de, jeńis Dıdarǵa berildi. Jerlesimiz eki jyl buryn Majarstanda ótken álem chempıonatynda da qola medal ıelengen bolatyn.