- Jalpy komandalyq esepte 12-satyǵa turaqtaǵan sportshylardy Astana áýejaıynan jankúıerler saltanatpen qarsy aldy. Álem chempıonatyna 85 elden 2000-ǵa tarta sportshy qatyssa, 49 memlekettiń ókilderine medal buıyrdy. Jerlesterimiz fýll-kontakt bóliminde joǵary nátıjege qol jetkizdi. Nurasyl Tilektesov (51 kg), Dinmuhammed Baımuratov (54 kg), Batyrhan Qýandyqov (67 kg) álem chempıony atandy. Fınaldyq saıysta súringen Maqsat Úsip (71 kg), Marǵulan Aıdaruly (75 kg), Musa Merzıev (63,5 kg), Fazlıddın Safarov (+91 kg) kúmis medaldy mise tutty. Qola júlde Laýra Nyshanbaı (56 kg) men Tımýr Ganzaǵa (81 kg) buıyrdy. K-1 bóliminde synǵa túsken Jandos Nazarbekov (60 kg) kúmis, Álı Ábýtáli (67 kg) qola júldeger atandy. Loý-kık bóliminde tórt otandasymyz fınalda súrindi. Álıhan Ozdoev (67 kg), Dýlat Dúısenov (60 kg), Dıas Karmanov (57 kg), Shara Hamzına (65 kg) kúmis júldeger atansa, Nurman Ábiltaı (51 kg), Sarvar Sýlaımanov (54 kg), Ilmaıl Lıýshanlo (63,5kg), Beknur Daýylbaev (+91 kg) qola medal enshiledi. Laıt-kontakt synynda Nursát Ǵalymbekulyna (+94 kg) kúmis medal buıyrdy.
- Birikken Arab Ámirliginiń Ábý-Dabı qalasynda dzıýdodan álemdik «Grand Slam» kezeńi ótti. Bási joǵary dodaǵa 53 memleketten 401 sportshy qatysyp, tartys kórigin qyzdyrdy. Olımpıada chempıondary men júldegerleri, álem birinshiliginiń jeńimpazdary beldesýge túsken saıystan jerlesterimiz 1 qola medalmen oraldy. Bapkerler quramy áıelder arasyndaǵy saıysqa Ábıba Ábýjaqynova (48) kg, Baqyt Qusaqbaeva (57 kg), Esmıgúl Kýıýlovaǵa (63 kg) senim artty. Erler dodasynda Maǵjan Shamshadın, Aman Baqytjan (60 kg), Nurqanat Serikbaev, Ǵusman Qyrǵyzbaev (66 kg), Eset Qýanov (73 kg), Azat Kúmisbaı, Abylaıhan Jubanazar (81 kg), Ermahan Ánýarbekov (90 kg), Marat Baıqamurov, Nurlyhan Sharhan (100 kg) Elaman Erǵalıev (+100 kg) beldesýge tústi. Álem chempıonatynyń qola, kúmis júldegeri Ábıba Ábýjaqynova ǵana qalyń jankúıer úmitin aqtap, qola medal ıelendi. Qalǵan balýandar jeńilip qaldy.
- Italııanyń Mılan qalasynda konkıden jasóspirimder arasynda álem kýboginiń kezeńi ótip jatyr. Otandasymyz Krıstına Shýmekova 1000 metrdi 1, 17, 485 sekýndta júgirip ótip top jardy. Kúmis medal japon qyzy Aıano Sekıgýchıge, qola júlde polıaktyń talantty qyzy Hanna Mazýrǵa buıyrdy. Krıstına 3000 metr qashyqtyqta da jeńimpaz atandy. Bul qashyqtyqta kúmis medal Nıderland sportshysy Lıke Heızınkke buıyrsa, qytaılyq Szıamın Szıan qola júldeni qanaǵat tutty.
