Is-sharany Sýho holdıngter toby men Nankın qalasynyń Sıýaný aýdany ákimdigi birlesip uıymdastyrdy. Forýmǵa Qytaı jáne Ortalyq Azııa elderiniń týrızm mınıstrlikteriniń basshylary, dıplomatııalyq korpýstar, Iаnszy ózeni atyraby aımaǵyndaǵy iskerlik jáne mádenı uıymdardyń jetekshileri, sondaı-aq óńirlik týrızm ındýstrııasynyń ókilderi qatysty.
Qazaqstan tarapynan Týrızm jáne sport mınıstrligi Týrızm ındýstrııasy komıtetiniń tóraǵasy Nurtas Káripbaev qatysyp, týrızm men mádenıet salalarynda seriktestik pen tájirıbe almasýdy keńeıtýdiń mańyzyn atap ótti. Tóraǵa Qazaqstannyń týrıstik áleýetin tanystyryp, birlesken jobalardy damytý, týrıster aǵynyn arttyrý jáne eldiń biregeı tabıǵı ári mádenı nysandaryn ilgeriletý múmkindikterine toqtaldy.
Bul shara Qazaqstan Prezıdenti Qasym-Jomart Toqaev pen Qytaı Tóraǵasy Sı Szınpınniń den qoıǵan joǵary deńgeıli saıası dıalogy men strategııalyq áriptestiginiń zańdy jalǵasy ekeni aıqyn sezildi. Eki memlekettiń kóshbasshylary týrızm men mádenı-gýmanıtarlyq almasýdy syrtqy saıasattaǵy negizgi basymdyqtardyń biri retinde belgilep otyr. Memleket basshylary jarııalaǵan «2024 – Qytaıdaǵy Qazaqstan týrızmi jyly» jáne «2025 – Qazaqstandaǵy Qytaı týrızmi jyly» bastamalary osy baǵyttaǵy júıeli jumystardyń irgetasy ispettes. Prezıdent Q.Toqaev pen Tóraǵa Sı Szınpın qoldaǵan bul jobalar eki eldi mádenı-tarıhı sabaqtastyqty jańa sapalyq deńgeıge kóterýdi kózdeıdi.
Is-shara aıasynda «Iаnszy deltasy – Ortalyq Azııa Mádenı-týrızm yntymaqtastyq alıansy» jónindegi bastamashyldyq hatqa qol qoıyldy. Bul alıans kópjaqty seriktestikti turaqty túrde uıymdastyrýǵa, aqparat almasý tetikterin jetildirýge, birlesken týrıstik marshrýttar ázirleýge jáne mádenı baǵdarlamalardy úılestirýge múmkindik beredi. Sonymen qatar Sýho holdıngteri men Ortalyq Azııa elderiniń týrızm uıymdary arasynda birqatar memorandýmdarǵa qol qoıylyp, birlesken jobalardy iske asyrýǵa naqty baza qalyptasty.
Forým aıasynda «Jibek joly mádenı-týrızmin ilgeriletý ortalyǵy (Iаnszy atyraby)» resmı túrde ashyldy. Bul ortalyq Qazaqstandy qamtyǵan Ortalyq Azııa elderi men Qytaı arasyndaǵy mádenı baılanysty turaqty túrde úılestiretin platforma rólin atqarady. Sondaı-aq «Sýho Cloud – Jibek joly óner buıymdary» sıfrlyq saýda platformasynyń iske qosylýy óńirdegi kreatıvti ındýstrııalar úshin jańa naryqtyq múmkindikter ashty.
Is-sharanyń mádenı mazmuny da erekshe boldy. Shaı rásimi, aǵash jáne jańǵaq oımyshy, jibek toqyma, altyn japsyrma, qaǵaz qıý, keramıka, dástúrli qolóner buıymdary usynylǵan ulttyq beımaterıaldyq mura kórmesi qatysýshylarǵa tereń áser qaldyrdy. Bul mádenıet pen týrızmniń bir-birin tolyqtyryp, ózara baıytatynyn aıqyn kórsetti.
Forýmnyń kórnekti jobalarynyń biri – «2025–2026 Iаnszy atyraby – Jibek joly: myń ónerpazdyń shyǵarmashylyq sapary» bastamasy boldy. Bul baǵdarlama sheńberinde Qazaqstan jáne Qytaıdyń, sondaı-aq basqa Ortalyq Azııa elderiniń sýretshileri, fotograftar, mýzykanttar, jazýshylar ejelgi Jibek jolynyń tarıhı baǵyttaryn aralap, krossmádenı shyǵarmashylyq týyndylar jasamaq. Bul joba halyqtar arasyndaǵy rýhanı jaqyndasýdy kúsheıtip, mádenı dıplomatııany tereńdetýge qyzmet etedi.
Nankındegi forýmnyń nátıjeleri Qazaqstan úshin mańyzdy. Bul – elimizdiń týrıstik áleýetin Qytaıdyń qarqyndy ósip kele jatqan naryǵynda keńinen tanytýǵa, jańa týrıstik aǵyn qalyptastyrýǵa, óńiraralyq jáne salalyq seriktestikti nyǵaıtýǵa múmkindik beretin alań. Eń bastysy, bul is-shara Qazaqstan Prezıdenti Qasym-Jomart Toqaev pen Qytaı Tóraǵasy Sı Szınpın belgilep bergen strategııalyq baǵyttardyń tabysty júzege asyp kele jatqanyn aıqyn dáleldeıdi.
Jarqynbek JUMADIL
