Foto: Ulttyq ulan
Jaqyn kúnderi taǵy 8 aımaqtyń jas býyny kelip qosylmaq.
Osylaısha, bólim jańa shaqyrylymdy tolyq qabyldap, úlken áskerı mekteptiń alǵashqy sabaǵyn bastaýǵa daıyn tur.
Ultyq ulannyń málimetinshe, alǵashqy kezeńde barlyq jas sarbazdar oqý rotalaryna bólinip, bastapqy jaýyngerlik daıyndyqtan ótedi. Munda olar áskerı tártip negizderimen, qarý-jaraqpen jumys isteý erejelerimen, saptyq daıyndyqpen, sondaı-aq bólimsheniń ishki tártipterimen tanysady. Tájirıbeli nusqaýshylar men ofıserlik quram olarǵa jan-jaqty ádistemelik kómek kórsetip, jańa ortaǵa tez beıimdelýine yqpal etpek.
Jańa shaqyrylym quramynda Aqtóbe oblysynan kelgen jas sarbaz Qýanysh Qumarov ta bar. Ol óziniń áskerı bólimge alǵash qadam basqandaǵy áserimen bólisti.
«Ulttyq ulan sapyna qabyldanǵanyma erekshe qýanyshtymyn. Bul – árbir jigittiń ómirindegi jaýapty kezeń. Munda kelgen alǵashqy sátten-aq bizdi jyly qarsy alyp, túsindirme jumystaryn júrgizdi. О́zimdi jańa ortada senimdi sezinip kelemin. Elimniń aldyndaǵy boryshymdy adal atqarýǵa daıynmyn», deıdi ol.
5573 áskerı bóliminiń basshylyǵy jas sarbazdardyń áskerı ómirge tez beıimdelýin qamtamasyz etý maqsatynda barlyq qajetti sharalardy qolǵa alǵan. Azyq-túlikpen, kıim-keshekpen, turmystyq zattarmen tolyq qamtamasyz etý, áskerı-taktıkalyq daıyndyqty kezeń-kezeńimen júrgizý – bólim úshin basty mindetterdiń biri.
Aldaǵy aptalarda oqý rotalarynda qarqyndy daıyndyq bastalyp, jaýyngerler ant qabyldaý rásimine daıyndalady. Bul – olardyń áskerı ómirdegi eń mańyzdy ári jaýapty qadamdarynyń biri bolmaq.
