Foto: Májilis
Depýtattyń aıtýynsha, óńirlerge issapary kezinde 2-shi toptaǵy qant dıabetimen aýyratyn bir top azamattar qabyldaýynda bolyp, máselelerimen bólisken eken.
«Bir oblystyń ózinde olarǵa tólenetin birjolǵy tólem bir aýdanda tólense, bir aýdanda tólenbeıdi. Bul teńsizdik – Máslıhat sheshiminiń ártúrli bolýymen baılanysty bolǵandyqtan, atalǵan sheshimdi ózgertýdi usyndym. Alaıda, Máslıhat «mınıstrliktiń qorytyndysy bolmasa sheshimdi ózgertý múmkin emes», dedi. Árıne, budan keıin mınıstrlikke hat joldadym. О́kinishke qaraı, mınıstrlik máslıhattyń jaýabyn jiberýmen shekteldi», dedi Nurgúl Taý.
Osyǵan baılanysty Májilismen eki suraǵyn Densaýlyq mınıstrine qoıdy.
«Mınıstrlik 2-shi toptaǵy qant dıabetimen aýyratyndarǵa birjolǵy tólem qarastyrýǵa bolatyny týraly resmı qorytyndy bere ala ma? Osy máseleni respýblıka kóleminde bir júıege engizý josparlaryńyzda bar ma?», dedi depýtat N.Taý.
О́z kezeginde Densaýlyq saqtaý mınıstri Aqmaral Álnazarova depýtattyń atalǵan suraqtaryna jaýap berdi.
«Bul – jergilikti ózin-ózi basqarý zańymen belgilengen. Sondyqtan ár oblys óziniń ókiletti organdarymen bekitilgen tizimdi keńeıtýge-azaıtýǵa nemese tizimge qosymsha dıagnozdardy qosýǵa quqyqtary bar. Al, birkelki júıege keltirý máselesin qosymsha qaraıtyn bolamyz», dedi Aqmaral Álnazarova.
