Jańa ákimge jańa mindetter júkteldi

Qazaqstan Prezıdenti Nursultan Nazarbaev sapar aıasynda qalalyq máslıhattyń sessııasyna qatysty. Sessııa barysynda Almaty qalasynyń jańa ákimi Baýyrjan Baıbektiń kandıdatýrasy depýtattar tarapynan biraýyzdan qoldaý tapty. Memleket basshysy, sondaı-aq, qala aktıvimen kezdesip, jańa basshyny tanystyrdy jáne megapolıstiń budan arǵy damý baǵyttaryn aıqyndady. Elbasy «Astana EKSPO-2017» Ulttyq kompanııasynyń basshy­­lyǵyna taǵaıyndalǵan Ahmetjan Esimov Almaty qalasynyń ákimi laýazymynda úlken jumys atqarǵanyn atap ótti. Osy ýa­qyt aralyǵyn­da qala eleýli nátı­je­lerge qol jet­kiz­di, kelbeti ózger­di, barynsha ıkemdi ári jaıly bola tústi. Baspana qurylysy qar­qyndy júrgizilip, jańadan eki aýdan paıda boldy. Azıada tabysty ótkizildi, qazirgi kezde Dúnıejúzilik stýdentter oıynyna daıyndyq júrip jatyr. Almatyda shaǵyn jáne orta bıznes ekpindi damýda. Onyń úlesi qala ekonomıkasynda 30 paıyzdan asyp, bıýdjet túsimderiniń úshten ekisin qamtamasyz etip otyr. Bul – mańyzdy kórsetkish, – dedi Nursultan Nazarbaev. Prezıdent atap ótkendeı, A.Esimovtiń tájirıbesi qazirgi ýaqytta Astanada EKSPO kór­­­mesin uıymdastyrý jáne ótkizý úshin qajet. EKSPO-2017 – bizdiń bola­shaǵymyz. Kórme nysan­darynyń qurylysy – bul mindettiń tek bir qyry ǵana. Onyń basqa, áldeqaıda mańyzdy qyry – mazmundyq tolyǵýy. EKSPO-2017 Qazaqstannyń barlyq salada balama energetıka­ny damytý arqyly jańa tehnolo­gııalyq qurylysqa ótýi úshin serpin berýi tıis. Ulttyq kompanııanyń basshylyǵyna úkimetpen, barlyq óńirlerdiń ákimdikterimen is-qımyl jasaıtyn, ınvestısııa jáne tehnologııa tartý úshin álemniń ondaǵan elderimen jumys isteıtin tájirıbeli adam kerek, – dedi Memleket basshysy. – Bul jyldar aralyǵynda qala bıýdjeti 2 esege ósip, qala ekonomıkasy turaqty damýda. О́tken jyly tuńǵysh ret qalanyń jalpy óńirlik ónimi 8 trıllıon teńgeden asty. Sóıtip, 45 mıllıard dollardy quraıdy. Bul bizdiń kórshilerimizge qaraǵanda qomaqty. Adam basyna shaqqanda 28 myń dollar. О́tken jyly jalpy óńirlik ónim ósimi 7,1 paıyzdy qurady. Ústimizdegi jyldyń birinshi toqsanyndaǵy kórsetkish 9,2 paıyzdy kórsetti. Iаǵnı, ekonomıkanyń barlyq kórsetkishteri boıynsha ósim baıqalýda. Jartyjyldyq nátıje boıynsha turaqty ósim bar. Bıýd­jet jınalymy ótken jylmen salystyrǵanda 40 mıllıard teń­gege artty. Ujymǵa rahmetimdi bildirgim keledi. Olar bir komanda bolyp jumys istedi. Bul Sizdiń ko­mandańyz. Olar Sizdiń alǵa qoı­ǵan min­det­terińizdi atqardy jáne qoldarynan kelgenshe tyrys­ty da. Eń bastysy, almatylyqtar Sizdi ózderiniń kóshbasshysy retinde syılaıtyndyǵyna jáne baǵalaıtyndyǵyna sendirgim keledi, – dedi A.Esimov. Nursultan Nazarbaev Almaty eldiń iri qalasy ǵana emes, ekonomıkanyń lokomotıvi ári ǵylymı-aǵartýshylyq ortalyq bolǵandyqtan, ony basqarý tá­jirıbeli jáne kreatıvti kadr­dy qajet etetinine nazar aýdardy. Baýyrjan Baıbek – osyndaı laýazymǵa taǵaıyndalyp otyrǵan «Bolashaq» baǵdarlamasynyń birinshi túlegi. Ol Syrtqy ister mınıstrligi júıesinde, Prezıdent Ákimshiliginde jumys istedi, «Nur Otan» partııasy Tóraǵasynyń birinshi orynbasary boldy. Qasymda jumys isteı júrip, meniń qyzmetimdi kórdi, búkil respýblıkamyzdy aralady, mańyzdy saılaý naýqandaryna qatysty, al bizdi alda parlamenttik saılaý kútip tur, bul ońaı synaq emes. Onyń qala aldynda turǵan mindetterdi elde júzege asyrylyp jatqan baǵdarlamalar aıasynda sizdermen birlesip sheshe alatynyna senimdimin, – dedi Prezıdent. Memleket basshysy Almaty qalasynyń budan ári damýynyń negizgi baǵyttaryn da atady. Birinshi kezekte, qalanyń ǵylymı jáne kadrlyq áleýetin, onyń ınvestısııalyq tartymdylyǵyn paıdalana otyryp, ınvestısııa tartý jáne jańa óndiris oryndaryn ashý jumystaryn jandandyrý kerek. Sondaı-aq, shaǵyn jáne orta bıznesti qoldaý jumystaryn múlde jańa deńgeıge shyǵarý qajet bolady. Almaty ejelden kásipkerliktiń ortalyǵy bolyp sanalady, sondyqtan, ekonomıka úshin kúrdeli kezeńde bıznestiń belsendiligin tómen­detpeı, kerisinshe, ulǵaıtý úshin memlekettik qoldaýdyń barlyq sharalaryn qabyldaý kerek, – dedi Nursultan Nazarbaev. Sonymen qatar, Elbasy 2017 jylǵy Ýnıversıadany joǵary deńgeıde ótkizýdi jáne salynǵan barlyq nysandardyń ol ótkennen keıin tıimdi paıdalanylýyn qamtamasyz etýdi tapsyrdy. Nursultan Nazarbaev atap ótkendeı, kólik ınfraqurylymy jetildirýdi qajet etedi, al onymen ekologııalyq ahýal da baılanysty. Qalada keptelister men kólik turaqtary máselesi áli kúnge túbegeıli sheshilgen joq. Jol toraptary salyndy, metro iske qosyldy, qoǵamdyq kólikti gazǵa kóshirý júrip jatyr. Munyń bári ahýaldy aıtarlyqtaı jaqsartýǵa kómektesedi, bul jumystardy jalǵastyrý kerek, – dedi Memleket basshysy. Prezıdent taǵy bir mańyz­dy baǵyt retinde qaladaǵy qyl­mysqa tosqaýyl qoıyp, ahýaldy jaqsartý máselesin aıtty. Biz Almatyda týrızmdi damytýǵa nıettimiz, sondyqtan qala qaýipsiz ári ómir súrý úshin jaıly bolýy tıis, – dedi Elbasy. Sondaı-aq, Memleket basshysy stýdenttik ortalyq bolyp sanalatyn megapolıste ǵylym men bilimdi odan ári damytýdyń, jastardy jumysqa ornalastyrý máselesin sheshýdiń mańyzdylyǵyn atap ótti. Sessııa sońynda Nursultan Nazarbaev el ekonomıkasyndaǵy kúrdeli ahýaldy eńserý jáne onyń ári qaraı júıeli damýy kóp jaǵdaıda Almatynyń tabysty damýymen baılanysty ekenine nazar aýdardy. – Búgin Elbasy meni Almaty ujymy aldynda tanystyrdy. Qalanyń jetistikteri týraly kóp aıtyldy. Prezıdent atap ótkendeı, Almaty táýel­sizdigimizdiń besigi sanalady. Men úshin sizdiń usynysyńyz, al máslıhat depýtattarynyń kelisimi baqyt. Men muny úlken jaýapkershilikpen qabyl alamyn. Sizge kóp rahmet, senimnen shyǵýǵa tyrysamyn, – dedi B.Baıbek. Álısultan QULANBAI, «Egemen Qazaqstan».