Foto: Ashyq derekkóz
Qala ákimdiginiń málimetinshe, elordadaǵy JRVI men tumaýdyń órship turǵan kezinde dárigerler kúnine 50-60 balany qabyldaǵan. Qazir kórsetkish tómendegenimen, maýsym áli aıaqtalǵan joq.
«Balalar vırýsty bir-birine juqtyrdy. Qalada JRVI men tumaý birdeı taralyp júr. Vırýstyq ınfeksııa jeńil ótedi, temperatýrany tómendetetin dáriler kómektesedi, al tumaý áldeqaıda aýyr ótedi. Joǵary temperatýra baıqalady, ony túsirý qıynǵa soǵady. Balanyń jaǵdaıy álsireıdi, ıntoksıkasııa baıqalady.Qosymsha jótel, muryn bitelýi paıda bolady», dedi dáriger.
Pedıatr ata-analardy óz betinshe emdeýge jol bermeýge jáne alǵashqy sımptomdar paıda bolǵanda dereý dárigerge qaralýǵa shaqyrdy.
«Tósekte demalý qajet. Kóptep jyly sýsyn ishkizý kerek – sý, kompot, mors. Qantty shyryndar men gazdalǵan sýsyndardy ýaqytsha berýge bolmaıdy. Bólmeni únemi jeldetip, dymqyl kúıge aınaldyrý kerek, balany orap tastaýǵa bolmaıdy. Solǵyn tartyp turǵandyqtan, tońyp turǵandaı kórinýi múmkin, sonyń áserinen qalyń kıindirgendikten, dene qyzýy tipten kóterilýi múmkin.
Temperatýrany túsiretin birneshe dárini bir ýaqytta berýge bolmaıdy. Dári berilgennen keıin temperatýra dereý 36,6 gradýsqa túsýi kerek dep oılaýdyń qajeti joq. Bir-eki gradýsqa tómendese, bul dáriniń áser etip jatqanyn bildiredi.
Tumaý kezinde qabyný, pnevmonııa, farıngıt, tonzıllıt jáne taǵy basqa asqynýlar bolýy múmkin. Kózdiń konıýnktıvıti, qyzarýy, murynnan qan ketý de baıqalýy múmkin», dep túsindirdi ol.
Taǵy bir qatelik – dárigerdiń taǵaıyndaýynsyz antıbıotık qoldaný.
«Bul qate, óıtkeni tumaý men JRVI-de olar kómektespeıdi, aýrýdyń sebebi vırýsta, mundaıda antıbıotıktiń qajeti joq. Biz olardy tek qabyný nemese pnevmonııa sekildi asqynýlar bolǵanda ǵana taǵaıyndaımyz. Ondaı jaǵdaıda da dárigerdiń nusqaýymen, balanyń jasyn, salmaǵyn jáne ózge de erekshelikterin eskere otyryp qabyldaý kerek. О́z betimen bastaýǵa bolmaıdy, óıtkeni basqa dáriler sııaqty janama áseri bar. Qate dozada qoldansa, baýyr men búırekke zaqym keltirýi múmkin. Tipti vırýsqa qarsy dárilerdi de tek dárigerdiń taǵaıyndaýymen ǵana qoldaný qajet», dep qorytyndylady Raýshan Tektibaeva.
