Qazaqstan Respýblıkasy Premer-mınıstriniń orynbasary – Mádenıet jáne aqparat mınıstri Aıda Balaevanyń joldaǵan quttyqtaý hatyn Mádenıet komıtetiniń tóraǵasy Erlan Dákenov oqyp berdi.
«Alǵash qurylǵan kúnnen bastap-aq ansambl elimizdiń mádenı keńistiginde eleýli oryn alyp, tól ónerimizdi álemge tanytý jolynda aıanbaı eńbek etip keledi. Osylaısha, qazaq bı óneriniń qara shańyraǵy san urpaqtyń rýhanı temirqazyǵyna aınalyp, ulttyq bolmysymyz ben mádenı qundylyqtarymyzdy bı tilinde sóılete bildi», delingen mınıstrdiń quttyqtaýynda.
Konsert ulttyq horeografııanyń tańdaýly úlgilerin jáne túrli etnomádenı dástúrlerdi toǵystyrǵan kórkem óner merekesi boldy. Ansambl jańartylǵan konserttik baǵdarlamasynda klassıkalyq qazaq bıleri men álemdik horeografııanyń úzdik qoıylymdaryn usyndy.
Keshtiń erekshe atmosferasyn qurmetti qonaqtardyń óneri tolyqtyra tústi. Erkeǵalı Rahmadıev atyndaǵy Memlekettik akademııalyq fılarmonııanyń Qazaq orkestri, «Qazaqkonsert» RMKU-nyń «Birlik» án-bı ansambli, áıgili «Gúlder» ansambli, «Shalqyma» halyq bı ansambli jáne «Naz» memlekettik bı teatrynyń ujymdary merekelik keshtiń sánin keltirdi.
