Ashylý saltanatyna oblys ákiminiń orynbasary Álibek Áldeneı, qordyń basqarma tóraǵasy Lázzat Shyńǵysbaeva, Qamqorshylyq keńes múshesi, Májilis depýtaty Murat Ábenov, oblystyq bilim basqarmasynyń basshysy Dýlat Jekebaev, qala ákimi Ǵalym Áshimov, oqýshylar men ata-analar, sportshylar qatysty.
Saltanatty jıyn barysynda qonaqtar №8 jáne №17 jalpy bilim beretin mektepterdegi jańa sport jáne oqý ınfraqurylymymen tanysty, sondaı-aq «Balalar tehnoparkinde» boldy.
«Qazaqstan halqyna» qorynyń basqarma tóraǵasy Lázzat Shyńǵysbaevanyń aıtýynsha, Qaraǵandy oblysyna bólingen 4,7 mıllıard teńgeniń 700 mıllıony medısına men áleýmettik salany damytýǵa, al 4 mıllıardy bilim salasyna baǵyttalsa, onyń 2,4 mıllıardy Temirtaý qalasynyń 30 mektebinde jańa sport alańdaryn salýǵa, qajet jabdyqtardy satyp alýǵa jumsalǵan.
Quryshshylar qalasyndaǵy №8 jalpy bilim beretin mektep eki joba aıasynda qarjylandyrylyp, jalpy somasy 110,5 mıllıon teńge boldy. 2024 jyly «QH – Qaraǵandy oblysynyń mektepterinde «Bilim-ınnovasııa» lıseıleriniń tájirıbesin engizý» jobasy aıasynda mekteptiń fızıka, hımııa jáne bıologııa pánderiniń kabınetteri zerthanalyq, ınteraktıvti jáne kompıýterlik jabdyqtarmen qamtamasyz etildi. Jobanyń quny – 35,9 mıllıon teńge.
Mektep dırektory Gúlbaram Úsenova kelgen qonaqtardy jańartylǵan pán kabınetterimen tanystyryp, odan keıin syrttaǵy jańa sport alańynyń ashylý saltanatyn ótkizdi.
«QH – Temirtaý qalasynyń bilim uıymdary oqýshylarynyń dene shynyǵýyn damytý» jobasy aıasynda quny 74,5 mıllıon teńge bolatyn sport alańynda fýtbol alańy, 2/1 úlgisindegi voleıbol-basketbol oıyn alańy, jattyǵý aımaǵy, sondaı-aq kóshe trenajerlary men vorkaýt kesheni boı kóterdi.
Sonymen qatar «Balalar tehnoparkinde» 10 oqý sheberhanasy men zerthanalary: «Jasyl mektep», «Jasandy ıntellekt», robottehnıka jáne pılotsyz kólik zerthanalary, bastapqy tehnıkalyq modeldeý, keme jáne avtoúlgileý sheberhanalary, telestýdııa kabınetteri ashyldy. Bul jobanyń quny 221,5 mıllıon teńgeni qurady.
Qaladaǵy №4, №10, №17, №27 jáne №29 mektepterine hokkeı korttary syılyq retinde ornatyldy. Temirtaý mektepterindegi sport alańdaryn salý jobasyn «Batyr bolamyn» qoǵamdyq qory atqardy.
№8 mekteptiń sport alańynyń ashylý saltanatynda oblys ákiminiń orynbasary Álibek Áldeneı sóz alyp, «Prezıdentimiz árqashan elimizde adamı kapıtaldy damytýǵa nazar aýdarady. «Qazaqstan halqyna» qorynyń osy jobasy Temirtaý oqýshylarynyń jan-jaqty bilim alyp, sportpen shynyǵýyna múmkindik beredi», dedi.
Sport kesheniniń lentasyn Májilis depýtaty Murat Ábenov, Qamqorshylyq keńes tóraǵasynyń orynbasary Gaýhar Beıseeva jáne 10-synyp oqýshysy Arysulan Qojamuratov qıyp, ardager ustazdar shashý shashty.
Ashylý rásimine arnaıy kelgen bapker, mektep túlegi, karate sportynan álem chempıony, qara belbeý ıegeri Nursultan Qojamuratov shákirtterimen óner kórsetti.
№17 mektep te «Qazaqstan halqyna» qorynan 142,8 mıllıon teńge qarjylaı qoldaý alyp, pán kabınetterin jańartty jáne sport alańyn salýǵa múmkindik aldy.
«Balalar tehnoparki» jumys istep turǵan 6 úıirmege jańa qural-jabdyqtar satyp áperilip, ınjenerlik baǵytta taǵy 4 úıirme ashyldy, oǵan mamandar arnaıy oqytyldy. Qor tirek mektepter men erekshe balalarǵa arnalǵan mektep-ınternatqa da qajetti qural-jabdyqtar men sport alańdaryn salýǵa kómek kórsetti.
Bul jobanyń nátıjesinde Temirtaý qalasynyń bilim sapasy 3,1 paıyzǵa ósip, 56,9 paıyzdy qurady. 2024–2025 oqý jylynyń túlekteri arasynda 28 oqýshy «Altyn belgi» ıegeri atansa, 52 oqýshy úzdik attestat aldy. Ulttyq biryńǵaı testileýge 927 túlek qatysyp, 201-i memlekettik grantqa ıe boldy, onyń ishinde tehnıkalyq mamandyqtarǵa oqýǵa túskender de bar.
Jobanyń arqasynda qalanyń 30 mektebi jańa fýtbol alańdary, basketbol-voleıbol aımaqtary, vorkaýt keshenderi jáne hokkeı korttarymen qamtyldy. Jańa sporttyq jáne oqý ınfraqurylymy 24 myń oqýshyǵa arnalǵan, olar turaqty jattyǵýlar ótkizip, túrli jarystarǵa qatysýǵa múmkindik alady.
Jalpy Qaraǵandy oblysyndaǵy jeti qosymsha bilim berý uıymy da jańa tehnıkalyq jabdyqqa ıe boldy. Olar ınjenerlik daǵdylardy, robottehnıkany jáne ǵylymı-tehnıkalyq shyǵarmashylyqty damytýǵa arnalǵan STEM-tehnıkamen tolyq jaraqtandyryldy. О́ńir boıynsha 35 úıirme jańartylyp, robottehnıka, baǵdarlamalaý, 3D-modeldeý jáne kıbersport baǵyttaryn qamtıtyn 21 jańa úıirme ashyldy.
– Biz zerthanalardy jańartýmen qatar, pedagogterdiń daıarlyǵyna da jiti kóńil bólip otyrmyz. Qazir muǵalimder mentorlyq qoldaý alýda. Oqýshylar saraıynda alty úıirme tolyq jańǵyrtylyp, taǵy tórteýi ashyldy, – dedi «Qazaqstan halqyna» qory basqarmasynyń tóraıymy Lázzat Shyńǵysbaeva.
«QH. «Bilim-Innovasııa» lıseıleriniń tájirıbesin engizý» jobasy aıasynda Qaraǵandy oblysynyń 86 mektebinde jaratylystaný pánderiniń zerthanalary jańartyldy. Pedagogter zamanaýı oqytý ádistemelerin meńgerip, biliktilikterin arttyrdy.
Qaraǵandy oblysy,
Temirtaý qalasy
