Foto: Qorǵanys mınıstrliginiń baspasóz qyzmeti
Qujatty Bas shtabtyń Uıymdastyrý-jumyldyrý jumysy departamenti áskerı qyzmet jáne áskerı-patrıottyq tárbıe týraly zańnamaǵa engizilgen túzetýlerdi eskere otyryp ázirledi. Erejeler mektepterde, kolledjderde jáne kásiptik bilim berý mekemelerinde alǵashqy áskerı daıyndyqty uıymdastyrý men oqytýdyń biryńǵaı tásilderin belgileıdi, pedagogterge qoıylatyn talaptardy naqtylap, kýrstyń praktıkalyq quramdas bóligin keńeıtedi.
Negizgi ózgeristerdiń biri «alǵashqy áskerı daıyndyq» páni qaıta oraldy. Baǵdarlama áskerı qyzmetshilerdiń quqyqtary, mindetteri men áleýmettik kepildikteri týraly praktıkalyq elementterdi, oqý-dalalyq sabaqtardy kóbeıtý jáne túsindirý jumystaryn keńeıtý esebinen kúsheıtiledi.
Qorǵanys mınıstriniń keńesshisi Aıgúl Tólembaeva jańartýlar bolashaq áskerge shaqyrylýshylardy daıarlaý sapasyn arttyrýǵa baǵyttalǵanyn atap ótti.
«Biz pándi onyń naqty mazmunyna saı etemiz. Bul azamattardy áskerge daıyndaýdyń birinshi kezeńi. Balalar áskerı qyzmetshiniń jarǵysyn, mindetterin, qyzmetten keıingi quqyqtary men kepildikterin túsinýi kerek. Búgingi ásker – bul naqty mamandyq pen bilim alýdyń múmkindigi. Mektep oqýshylarynyń bul týraly aldyn ala bilgenin qalaımyz», dedi ol.
Oqytýshylarǵa qoıylatyn talaptar aıtarlyqtaı ózgeredi. AÁD-ny mamandyǵy boıynsha pedagogıkalyq bilimi jáne áskerı qyzmet ótkerý tájirıbesi bar azamattar ǵana júrgize alady. Pán boıynsha jumys isteıtin muǵalimder óz laýazymdaryn saqtaıdy. Keminde on jyl eńbek sińirgen áskerı qyzmetshiler úshin Qorǵanys mınıstrliginiń áskerı oqý oryndarynyń bazasynda tegin pedagogıkalyq qaıta daıarlaý múmkindigi engiziledi.
Mınıstr keńesshisiniń aıtýynsha, bul sheshim kadrlyq bazany nyǵaıtyp, oqýshylardyń pánge degen senimin arttyrady.
«Oqýshylar áskerde qyzmet etken adamdy kórýi kerek. Bul qorqynysh pen senimsizdikti boldyrmaıdy, ári armııanyń qalaı jumys isteıtinin túsindirýge múmkindik beredi», dedi A.Tólembaeva.
Jańartylǵan erejeler áskerı bólimderdiń rólin keńeıtedi: oqý-dalalyq jıyndardyń praktıkalyq quramdas bóligi kúsheıtiledi, bólimshe komandırleri jekelegen sabaqtarǵa qatysyp, dalalyq bazany kórsetedi. AÁD oqytýshylarynyń biliktiligin arttyrý budan bylaı áskerı joǵary oqý oryndarynyń, kafedralardyń jáne Qorǵanys mınıstrliginiń vedomstvolyq baǵynysty uıymdarynyń bazasynda ǵana júrgiziledi. Bul ózekti áskerı tájirıbege qol jetkizýge yqpal etedi.
