Foto: Qarjy mınıstrligi
Taýarlardyń ulttyq katalogyna kimder qosylý kerek?
El aýmaǵynda taýarlar aınalymyna qatysy bar barlyq kásipkerlik sýbektisi TUK qosylýǵa mindetti. Olarǵa óndirýshiler, ımporttaýshylar, kóterme kompanııalar men dıstrıbıýtorlar, bólshek saýda dúkenderi men saýda jelileri, onlaın alańdar men marketpleıster jatady.
Ár qatysýshy birtutas bazany óz qyzmeti sheńberinde paıdalanady. Bul oraıda taýar kartasy tegin jasalatynyn aıta ketken jón. Sondyqtan TUK engizý baǵanyń ósimine áser etpeýi tıis.
Ulttyq katalogta taýar kartalaryn kimder tirkeýi kerek?
Tyń tetikte taýar kartalaryn ónim óndirýshileri nemese ony elge ákeletinder tirkeýge mindetti. Eger de 2026 jyldyń 1 qańtarynda TUK-ta tirkelmegen taýaryńyz satylymda tursa, meıli óndirýshi nemese ımporttaýshy bolmasańyz da oǵan NTIN kodyn belgileý kerek. Taýar kartasynyń bar-joǵyn tekserý úshin, sondaı-aq jańasyn jasap, ózgerister engizý úshin nct.kz saıtynda tirkelý qajet.
Jańa kartany toltyrǵan kezde taýardyń ataýy, brendi, sıpattamasy, quramy jáne qaı elde jasalǵany týraly aqparatty qosý qajet. Kartany jasamas buryn ónimniń katalogta bar-joǵyn teksergen jón. Júıede qazir 15 mln-nan astam karta bar. Eger de bir taýardy túrli ımporttaýshy jetkizýmen aınalyssa, demek onyń kartasy burynnan jasalǵan bolýy múmkin. Mundaı jaǵdaıda taýardy qaıta tirkeýdiń qajeti joq.
Baqylaý-kassalyq mashınalardy (BKM) jańartý: Kimge ne isteý kerek?
TUK-qa engizilgennen keıin barlyq baqylaý-kassalyq mashınasy NTIN kodtaryn bere alatyn 2.0.3 hattamasy boıynsha jumys isteýi kerek. Bul jumysty BKM tehnıkalyq qyzmeti Fıskaldy derekter operatorymen birlesip derbes júzege asyratynyn atap ótken abzal. Bızneske tek birtutas katalogta tirkelgen NTIN kody bar ónimdi paıdalaný men ony satý kezinde skanerleý qajet.
Bul rette Qazaqstan aýmaǵynda saýda qyzmetinde kassalyq mashınalardy qoldaný zańda belgilengen talap bolyp sanalatynyn aıta ketken durys. Bazarlar men aýyldyq jerlerdegi saýdagerler úshin jeńildetilgen shemalar qarastyrylady. Biraq júıege qosylýdan aınalyp ótýge jol berilmeıtinin eskerý qajet.
Eger de qandaı da bir ónimniń NTIN ulttyq kody bolmasa, onda saýdany buǵattamaý úshin oǵan ýaqytsha kod beriledi. Budan keıin kásipker TUK-ta qajetti málimetterdi engizip, turaqty kodty alýy tıis.
