Foto: Overclockers.ru
Depýtattyń aıtýynsha, balalar mundaı avtomattarǵa túski asqa berilgen aqshasyn jumsaıdy. Oıyn avtomattarynyń saldary aýyr bolmas úshin «Oıyn bıznesi týraly» zań aıasynda rettelmeıtin atalǵan qurylǵylardy ornalastyrý máselesin qaraý qajet.
«Sońǵy jyldary «Kran» nemese «Ustap al» dep atalatyn avtomattardyń keńinen taralýy alańdatyp otyr. Mundaı apparattarda aqshalaı utys qarastyrylmaǵandyqtan, qumar oıyndary sanatyna jatpaıdy. Zań mundaı avtomattardyń jumys mehanıkasy, utys algorıtmi, jas shekteýleri nemese ornalastyrý talaptaryna qatysty normalardy qamtymaıdy. Sanıtarııalyq normalar, saýda erejeleri, tehnıkalyq reglamentteri men basqa da talaptar belgilenbegen. Olardyń qaýipsizdigin, shyqqan jerin nemese balalarǵa arnalǵan sanıtarııalyq talaptarǵa sáıkestigin tekserýdiń mindetti mehanızmi joq. Bul avtomattarǵa jeke quqyqtyq mártebe berý, mindetti sertıfıkattaý men mehanıkalyq tekserýdi engizý, jas shekteýlerin belgileý, olardy balalar mekemeleri mańynda ornalastyrýǵa tyıym salý máselesin qaraý qajet», dedi Ǵalıasqar Sarybaev.
Sondaı-aq senator atalǵan avtomattarǵa baqylaýdyń bolmaýy zańsyz qolma-qol aqsha aınalymyn arttyrýy múmkin ekenine de nazar aýdardy.
