Foto: Ulttyq ekonomıka mınıstrligi
Kezdesýde Serik Jumanǵarın Leıa Gýterresti osy jylǵy shildede qyzmetke taǵaıyndalýymen quttyqtap, 1994 jyldan beri jalǵasyp jatqan áriptestiktiń mańyzyn atap ótti.
«Azııa damý banki biz úshin strategııalyq áriptes. Yntymaqtastyq kezeńinde Bank kólik, energetıka, ShOB, sıfrlyq damý, áleýmettik birqatar mańyzdy jobany qarjylandyrdy. Búgingi kezdesý áriptestigimizdi odan ári nyǵaıtýǵa, jańa perspektıvalyq bastamalardy júzege asyrýǵa yqpal etetinine senimdimiz. ADB-nyń Qazaqstan boıynsha 2023–2027 jyldarǵa arnalǵan eldik strategııasynyń negizgi basymdyqtary bizdiń ulttyq basymdyqqa tolyq sáıkes keletinin atap ótkim keledi. Qazaqstan budan ári de osy strategııany tıimdi júzege asyrýdy qoldamaq», dedi Serik Jumanǵarın.
О́z kezeginde Leıa Gýterres ADB Jarǵysyna túzetý boıynsha daýys berý kezinde Qazaqstandy qoldaýdyń mańyzdylyǵyn erekshe atady. Atalǵan túzetý banktiń kredıttik áleýetin 50%-ǵa – 36 mlrd dollardan asyrýǵa múmkindik bergen.
«Bizdiń yntymaqtastyǵymyzdyń barysynda 1994 jyldan bastap ADB Qazaqstanǵa 7 mlrd dollardan kóp qarajat berdi. Biz dástúrli baǵytta da, jańa sektorda da áriptestikti odan ári arttyrýǵa senemiz», dep atap ótti ol.
Gýterres sondaı-aq ADB bıyl strategııalyq mıneraldar men asa mańyzdy shıkizattar tizbegin qoldaýǵa arnalǵan jańa saıasatty júzege asyrýǵa kiriskenin aıtyp, Qazaqstanda osy salada áleýeti joǵary jobalardy zertteýge daıyn ekenin jetkizdi.
Serik Jumanǵarın Qazaqstan Úkimeti ADB, EADB, EQDB jáne Dúnıejúzilik bankti qosqanda, halyqaralyq qarjy uıymdarynyń úzdik tájirıbesin eskere otyryp, MJÁ salasyndaǵy zańnamany jańǵyrtyp jatqanyn atap ótti.
Kezdesý sońynda taraptar kólik ınfraqurylymy, ónerkásip, energetıka, sıfrlyq tehnologııalar, turǵyn úı qurylysy jáne krıtıkalyq materıaldar salasyndaǵy perspektıvalyq jobalardy birlese júzege asyrý jóninde pikir almasty.
