Foto: egemen.kz
Eńbek jáne halyqty áleýmettik qorǵaý mınıstrliginiń málimetinshe, elimizde 2025-2030 jyldarǵa arnalǵan ınklıýzıvti saıasat tujyrymdamasy, «Amanat» partııasynyń 2023-2027 jyldarǵa arnalǵan jol kartasy jáne Prezıdent tapsyrmasymen ázirlengen «Halyqpen birge» jobasy aıasynda múgedektigi bar adamdardyń quqyqtaryn qorǵaý jáne olardyń turmys sapasyn arttyrýǵa baǵyttalǵan aýqymdy jumystar jalǵasyp jatyr.
Partııanyń jol kartasynda Interaktıvti qoljetimdilik kartasyna engizilgen 43 myńnan astam nysandy kezeń-kezeńmen beıimdeý mindeti qoıylǵan.
«Jyl saıyn osyndaı obektilerdiń 20%-y beıimdelýi tıis. Osylaısha, 2023 jyly – Kartadaǵy obektilerdiń 20%-y, 2024 jyly – 40%-y, 2025 jyly – 60%-y, 2026 jyly – 80%-y, 2027 jyly – 100%-y beıimdeledi. Qazirgi ýaqytta el boıynsha 24 216 nysan tolyqtaı beıimdelgen», delingen habarlamada.
Aıta keteıik, búginde Qyzylorda oblysynda bıylǵa deıin 1578 nysan beıimdelgen.
Aımaqta beıimdelgen nysandardyń ishinde:
- Densaýlyq saqtaý uıymdary – 198;
- Bilim berý mekemeleri – 339;
- Mádenıet obektileri – 129;
- Memlekettik jáne kvazımemlekettik uıymdar – 201;
- Sport nysandary – 24,
- Áleýmettik qorǵaý uıymdary – 23,
- Kólik ınfraqurylymy obektileri – 14;
- Basqa da túrli nysandar – 650.
Bıyl Qyzylorda oblysynyń Áleýmettik qorǵaý departamenti Áleýmettik kodeks talaptarynyń oryndalýyn tekserý maqsatynda 129 tekseris júrgizgen. Onyń ishinde profılaktıkalyq baqylaý – 31, jospardan tys tekserý – 19, al prokýratýra bastamasymen 79 tekserý uıymdastyrylǵan.
«Tekserý nátıjesinde múgedektigi bar adamdardy áleýmettik qorǵaý jáne arnaıy áleýmettik qyzmetter kórsetý salasynda anyqtalǵan zańbuzýshylyqtardy joıý jóninde 37 nusqama berildi. Sondaı-aq jalpy somasy 4 mln 699,3 myń teńge bolatyn 37 ákimshilik aıyppul salyndy. Birlesken tekserýlerdiń qorytyndysy boıynsha prokýratýraǵa 79 qorytyndy usynyldy», delingen habarlamada.
Vedomstvo ókilderi alǵash ret anyqtalǵan buzýshylyqtar boıynsha aıyppul salynbaıtynyn, tek nusqama beriletinin atap ótti. Alaıda nusqama merziminde oryndalmasa, ákimshilik jaýapkershilik qarastyrylady.
