Foto: massaget.kz
Jańa Sý kodeksiniń 79-babyna saı tuıyq bógetterdiń qurylysyna tolyq tyıym salyndy. Endi shaǵyn ózenderde sý ótkizý múmkindigi qarastyrylmasa bóget turǵyzýǵa bolmaıdy.
Bul nelikten mańyzdy?
Sebebi tuıyq bógetter sý aǵysyn toqtatyp, ózen arnasynyń bitelýine, taıyzdanýyna jáne qurǵap ketýine ákeledi.
Jańa talapqa sáıkes tuıyq bógetter qaıta jańartylýy kerek ne tolyq buzylýy tıis. Al ózen arnalary qalpyna keltirilýi qajet.
Jańa redaksııada «ekologııalyq aǵyn» uǵymy engizildi. Endi ár ózende qajetti sý kólemi mindetti túrde saqtalýy kerek. Talapqa saı mundaı kórsetkish bekitilgen ózenderden sýdy alýǵa tyıym salynady.
Bul shara ózender sýynyń tartylyp, qurǵap ketýiniń aldyn alady. Sondaı-aq ekologııalyq aǵyn balyqtardyń tirshiligin, ózen boıyndaǵy ekojúıeniń turaqtylyǵyn saqtap, ósimdikterdi qorǵaý úshin qajet.
Kodekstiń 29-babyna saı ózenderde qansha sý qalýy kerek ekenin Sý resýrstary jáne ırrıgasııa mınıstrligi janyndaǵy Aqparattyq-taldaý ortalyǵy belgileıdi.
Sý qorǵaý aımaqtary men beldeýlerin saqtaý júıesine de ózgeris engizildi.
Eski kodekste sý qorǵaý aımaqtary týraly normalar bolǵanymen olardy iske asyrý tetikteri naqty qarastyrylmaǵan edi. Jańa kodeks boıynsha ákimdikter eki jyl ishinde barlyq eldi mekende sýdy qorǵaý aımaqtary men beldeýlerin belgileýi tıis. Shaǵyn ózender, kólder, batpaqty aımaqtar men muzdyqtardy qorǵaý sharalary da kúsheıtildi.
Klımattyń ózgerýine beıimdelý jáne tasqyn sýdy jınaý da nazarǵa alynǵan.
Eski kodeks mazmunynda naqty sharalar jetkiliksiz deńgeıde kórsetilgen edi. Jańa kodekste bul máselege qatysty jeke taraý arnalyp, ózen arnalaryn tazartý jáne tereńdetý, tasqyn jáne erigen qar sýyn jınaıtyn qoımalar salý kózdelgen. Jınalǵan sýdy qurǵaqshylyq kezinde paıdalaný úshin sýdy arnaıy ruqsatsyz biraq naqty talaptarǵa sáıkes jınaýǵa múmkindik beretin normalar engizilgen.
О́tken jyly ózender men kólderdi qalpyna keltirý jónindegi Jol kartasy bekitilgen. 2027 jylǵa deıin Qazaqstannyń 10 óńirinde 51 ózen men 1 kóldiń jalpy uzyndyǵy 815 shaqyrym bolatyn ýchaskelerin tazalaý josparlanyp otyr.
