Foto: Vıdeodan alynǵan kadr
Bári úsh jasar Aqjibektiń balabaqshadan sharshap, jylap kelýinen bastalǵan. Búldirshinniń anasy qyzynyń denesindegi kógergen izderdi baıqap, dabyl qaqqan.
«Qyzymnyń denesindegi kógergen izderdi alǵash ret jaz aılarynda baıqadym. Basynda qatty ýaıymǵa salynbaı, jaı ǵana ózim baqylap júrdim. Jaǵdaı túzelgen joq. Kerisinshe onyń denesinde kógergen izder tipten kóbeıe tústi. Tárbıeshisine jazdym. Ol toptaǵy balalar keıde ózara shekisip qalady dep jaýap berdi», deıdi qyzdyń anasy Mádına Buqarbekova.
Aqjibek jaǵdaıdy tolyq aıtyp bere almaǵandyqtan anasy balabaqshadan beınejazbany suratqan. Onda ózgelerdiń qyzǵa tıisip, ıterip jibergen sátteri bar. Kórinis ózge de ata-analardyń jaǵasyn ustatty. Eń soraqysy, sol jerdegi tárbıeshi búldirshinderdi tynyshtandyrý úshin esh áreket jasamaǵan. Aqjibekti topta bir saǵattaı jalǵyz qaldyryp, serýenge de shyǵarmaǵan. Al tús kezinde ony ózgelerden oqshaýlap tastaǵan.
«Toptaǵy tárbıeshi balalarǵa únemi qol kóteredi. Ata-analar bolyp dırektorǵa bardyq. Kameradaǵy jazbany kórsetýdi suradyq. Qyzymdy ózgelerden bólip, tańǵy tamaqtandyrý kezinde jalǵyz ózin shetke otyrǵyzyp qoıǵan. Al ózge balalar juptasyp otyr. Bul týraly dırektor da, ádisker de, tárbıeshiler de bilgen. Men bári de ádil bolsyn deımin. Osy jaǵdaıdy bile tura jasyrǵandar zań aldynda tıisti jaýap bersin», deıdi M.Buqarbekova.
Búldirshinge qol kótergen qyzmetker jumystan shyǵarylǵan. Al tárbıeshi óz mindetinen shettetilgen. Alaıda tergeý isi jalǵasyp jatyr. Ata-analardy mazalaıtyn bir suraq bar. Balabaqsha basshylyǵy mundaı jaǵdaıdy buǵan deıin nege kórmegen?
«Barlyǵyn kóre tura esh shara qoldanbaǵan tárbıeshige qatysty ishki qyzmettik tekserý júrip jatyr. Qazirgi ýaqytta onyń áreketiniń quqyqtyq baǵasy berildi. Balabaqsha dırektorynyń buıryǵymen barlyq jaǵdaı anyqtalǵansha óz mindetinen shettetildi. Osyny bile tura ýaqytyly aıtpaǵan ózge de qyzmetkerlerden túsiniktemeler alyndy. Eńbek zańdylyǵyna sáıkes tıisti tártiptik sharalar alynatyn bolady», deıdi bilim bóliminiń bas mamany Gúlbaný Hasenova.
Bilim bóliminiń mamandary, balabaqsha psıholgtarmen birlesip ata-analarmen sóılesip, zardap shekken búldirshinge psıhologııalyq kómek kórsetpek. Memlekettik mektepke deıingi uıymdaǵy bul máseleni polıseıler de zerttep jatyr.
«Oqıǵaǵa qatysy bar taraptarmen tergeý áreketteri júrgizilip, balabaqsha qyzmetkerlerinen, ata-analardan jáne kýágerlerden oqıǵa boıynsha málimetter jınaqtalýda. Tekserý nátıjeleri boıynsha oqıǵaǵa quqyqtyq baǵa berilip, zańda kózdelgen sharalar qabyldanady», deıdi Ulytaý oblystyq PD baspasóz qyzmeti.
Ata-analar balabaqshalarda baqylaýdy kúsheıtip, beınekamera sanyn arttyrýdy talap etti. Sebebi mektepke deıingi uıymdarda olardyń sany tym az.
